අනේ... අතිගරු ජනාධිපතිතුමනි, දුරු රට යන්න එපා!


අපේ ජනාධිපතිතුමා පහුගිය දොහේ කොරියාවට ගියේය. ඒ සසිරි බර කොරියාවෙන් මෙරටට සිරියාව ගෙනෙන්නට විය යුතු ය. නමුත් කොරියාවට කිව්වාට ඒ දකුණු කොරියාවට මිසක උතුරු කොරියාවට නොවේය. උතුරු කොරියාවට ගිහින් ඇමරිකාව තරහා කරගන්නට එතුමා අකමැති නිසා එහෙම නොයන්නට ඇති කියලයි මට හිතෙන්නේ. නමුත් ඇමරිකාව ද ඔය කියනා තරම් ඉක්මනට අප හා කේන්ති ගනීවී යැයි සිතන්නට ද අමාරු ය. ඒ මන්ද යත් අප හා අමනාප වී ඉල්ලන් කන්නට තරම් ඇමරිකාව මෝඩ නැති නිසා ය. ඒ ඇයිද කියා කියනවා නම් බැරිවෙලාවත් අප ඇමෙරිකානු භාණ්ඩ වර්ජනය කළහොත් ඇමරිකාවට වැලේ වැල් නැතිවන නිසා ය. අප ඇමරිකාවෙන් ඇතැම් භාණ්ඩ කිහිපයක් ආනයනය කරන්නේ ද ඔවුනට සහනයක් වීම පිණිසය.

උදාහරණයක් ලෙසින් කිවහොත් ඉන්ධන මිලෙන්, පොහොර, කෘමිනාශක ආදී ගැටළු වලින් පීඩිතව සිටිනා ඇමරිකානු තිරිඟු ගොවියා වස බීමෙන් ආරක්ෂා කරගන්නට ය. අනිත් අතට අප ඇමරිකාවට අපනයනය කරන භාණ්ඩ නැවැත්වුවහොත් එය ඉරානයේ අහමදීන්ජාඩ් තෙල් නැවැත්තුවාක් මෙන් ලේසියට ගත නොහැකි වනු ඇත. හේතුව අප එසේ කළහොත් ඇමෙරිකානු ජනතාවට අඳින්නට රෙදිත් නැතුව යන නිසා ය. ඔය කියනා කතන්දර කෙසේ වෙතත් වසර 2500ක තරම් ප්‍රෞඩ ඉතිහාසයක් ඇති අපේ රටට ඉතා ම ස්වාධීන චින්තනයක් ඇති බව ඇමරිකාව හොඳින් ම දන්නා නිසා ඇමෙරිකාව, ලෝකයේ අනිත් රටවලට, ඒ කියන්නේ චීනයට, රුසියාවට, ඉරානයට දමනා සෙල්ලම් අපට දමන්නට එන්නේ නැත. ඒ වරක් අප Google ප්‍රතික්ෂේප කර gmail එකවුන්ට් වසා දමා බ්ලොග් ඉවත්කරගනිමින්, නව සෙවුම් යන්ත්‍රයක් පවා ක්ෂණික ව යොදාගෙන කොකා පෙන්නූ හැටි, ඇමෙරිකාව හෙල්ලු හැටි ඔවුන්ට කලකට අමතක නොවන නිසා ය.

මේ ඇමරිකානු කතන්දරය නිසා කියන්නට ආ කතාවත් අමතක වී යන්නට ඉඩ තිබුණත් එය ඇමරිකානු අධිරාජ්‍යවාදී කුමන්ත්‍රණයක් ලෙස මෙය කියවන පාඨකයන් නොසිතිය යුතු ය. හේතුව, මේ කතාවට ඇමරිකාවත් යන්තමින් ගෑවී ඇති නිසා ය. අතිගරු ජනාධිපතිතුමා කොරියාවට සැපත් වූ විගස ම එතෙක් මෙරට නිදා සිටි පාරිභෝගික කටයුතු පිළිබඳ අමාත්‍යංශයේ නිළධාරීන් කළේ කුමක්ද? වහාම ක්‍රියාත්මක වන පරිදි තිරිඟු පිටි මිල රු 8.50 කින් වැඩි කිරීමයි. අතිගරු ජනාධිපතිතුමා මේ කිසිවක් දන්නේ නැති බව නම් ඉඳුරා ම කිවයුතු ය. මේ කාලකන්නි නිළධාරීන් ගේ මේ වෑයම ජනාධිපති තුමා ඇතුළු රජයේ කීර්ති නාමය විනාශ කරමින් බහුජාතික සමාගම් වලින් කොමිස් ලබා ගැනීම ය. අතිගරු ජනාධිපතිතුමා ට කිසිවෙකු හෝ මේ බව දන්වන්නේ නැති බව නම් විශ්වාස ය. ඊට හේතුව නෑදෑ හිතමිත්‍රාදීන්ගෙන වෙන් ව දුරු රට ගොස් සිටිනා එතුමාට මෙහි කරදර ගැන කියා මනස අවුල් කිරීම නොකළ යුත්තක් නිසා ය. නමුත් එසේ කරනා ජරා ගති ඇති එකෙකු දෙන්නෙකු හෝ සිටිය හැකි ය. අතිගරු ජනාධිපති තුමා කෙසේ හෝ මේ බව දැනගත්තද මවුරටින් බොහෝ දුර සිටිනා බැවින් ද පාර්ලිමේන්තුවේ එකඟතාවය හදිසියේ ලබාගත නොහැකි හෙයින් ද එතුමා ට කළ හැකි කිසිවක් ද නැත. රජයේ ඇමතිවරුන් ද සිටින්නේ මේ මොහොතේ ඉතා ම අසරණ වි ය. ඊට හේතුව ජනතාව වෙනුවෙන් කරන්නට කිසිවක් නොමැතිවීම ය. අතිගරු ජනාධිපතිතුමා ලංකාවේ සිටියා නම් එතුමා ගේ උපදෙස් පරිදි කිසිවක් හෝ කරන්නට තිබුණත් දැන් කරන්නට දෙයක් නොමැත. මේ සියළු කාරණා දන්නා නිළධාරීන්, මේ හැම අසරණ කර කාළකන්ණි සතුටක් ලබනවාදැයි කිසිවෙකුට සිතෙන්නේ නම් එයට වැරැදි යැයි කිසිවෙකුට කිව නොහැක.

කෙසේ වෙතත් මේ හදිසි ආපදා තත්වය දැනගත් විගස අතිගරු ජනාධිපතිතුමා ගිය කාරණය අතරමඟ දමා හෝ එනු ඇත. ඉන්පසු සති දෙකක් ඇතුළත් ඉක්මන් වාර්තාවක් කැඳවනු ඇත. සති දෙකක් යනවිට ප්‍රභාකරන් නියමය ආකාරයටම අපට මේ සියල්ල අමතක වන නිසා මේ ගැන හැඟීමක් ඇති නොවනු ඇත. ඒ කාලය වනවිට මේ තත්වය අපට පුරුදු වී ඇති නිසා නැවත අත්‍යාවශ්‍ය බඩු මිල පහත හෙලා ජනජීවිතය අවුල් කිරීමට කිසිවෙකු කැමති නොවනු ඇත. මීට පෙරද අතිගරු ජනාධිපතිතුමා චීනයේ සංචාරය කරන අතරතුරේ දී නිළධාරීන් ඉන්ධන මිල ඉහල දැමීමට කටයුතු කළෝ ය. මීට පෙර භාණ්ඩ මිල ඉහළ ගිය අවස්ථා බොහෝමයකදී ද අතිගරු ජනාධිපතිතුමා සිටියේ රටින් පිටත ය. රටක මෙවැනි සංවේදී කාරණා, ජාවාරම්කාර නිළධාරීන් ප්‍රයෝජනයට ගන්නා බව පෙනේ. අතිගරු ජනාධිපතිතුමා ගේ ඉදිරි සංචාරයක් ඉලක්ක කර ගෑස් මිල ඉහළ දමන්නට මේ බහුජාතික සමාගම් වල ගැත්තන් වූ නිළධාරීන් සැරසෙන්නට ඉඩ ඇත. ප්‍රජාතන්ත්‍රවාදී රටක් ජීවත්වන ජනතාවක් ලෙසට මේවාට ඉඩදිය යුතු නැත. ඒ නිසා අප සියළු දෙනා එකා වන් ව ගෙන් අතිගරු ජනාධිපතිතුමා ගෙන් ඉල්ලා සිටින්නේ, අනේ අතිගරු ජනාධිපතිතුමනී ආයෙත් නම් පිටරට යන්න එපා කියා ය.

බැරැක් ඔබාමා, චීන ජනාධිපති හු ජින්තාවෝ, මන්මෝහන් සිං, ආදීන් හමුවීම අත්‍යාවශ්‍ය නම් ඔවුන් මෙහි ගෙන්වා ගත හැකි ය. ඒවා ඉතා ම ලේසි කාරණා ය. ඒ නිසා ජනාධිපතිතුමා අහිංසක අපගේ මේ ඉල්ලීමට කන්දෙනු ඇති බව අප උදක් ම විශ්වාස කරමු...

37 දෙනෙකුට හිතුණ දේවල්:

Post a Comment

කමෙන්ටුවකින් දෙන්න පොඩි තල්ලුවක්. පෝස්ටුව ගැන හිතට හිතෙන දැනෙන ඕනෙ ම දෙයක් ලියන්න මෙතැන තමයි තැන ඔන්න.... හිතේ සතුට තමයි වටින්නේ !

පුද්ගලික ආරක්ෂාවේ අයිතිය හෙවත් ආත්මාරක්ෂාවේ නීතිය...


පුද්ගලික ආරක්ෂාව එහෙමත් නැත්තම් ආත්මාරක්ෂාව කියන දේ සම්බන්ධ නීතිය ගැන යමක් කියන්නයි හදන්නේ. අද රටේ තියෙන වාතාවරණයත් එක්ක බලද්දී නීතිය ගැන ඉගෙනගෙන නම් වැඩක් නෑ, කොහොමහරි අතපය එහාට මෙහාට වනන්න දැනගෙන හිටියානම් ඇති වගේ වුණත් කොයි එකටත් දැනගෙන ඉන්න එක හොඳයි මේ ගැන. සාමාන්‍ය ජනතාවට බලපාන මේ නීතිය කියන රාමුව ඇතුළේ ඉඳන් අපිට කරන්න පුළුවන් දේ සහ බැරි දේ ගැන දැනුවත් වෙලා ඉන්න එක වැදගත් වේවි, මොකද මම කියන්න යනදේ අපේ සාමාන්‍ය එදිනෙදා ජීවිතයට හරි ම වැදගත් නිසා. අපේ ආත්මාරක්ෂාව වෙනුවෙන් කරන්න පුළුවන් දේ ගැන දැනගන්න, එහෙම නම් කියවන්න මේ සටහන....

පුද්ගලික ආරක්ෂාවේ අයිතිය ලැබෙන්නේ පහරදීමකදී පමණක්ද ?

සාමාන්‍යයෙන් බොහෝදෙනෙක් මේ ගැන දන්නේ පහරදීමක් ගැන කිව්වම විතරයි. නැහැ, ඒක වැරදියි. ශරීරයට සිදුකරන හානි වලදී ජීවිතය බේරාගැනීමට විතරක් නෙවෙයි දේපළ වලට කරන හානි වළක්වා ගන්නත් පුද්ගලික ආරක්ෂාවේ අයිතිය පාවිච්චි කරන්න පුළුවන්.

පුද්ගලික ආරක්ෂාවේ අයිතිය ලැබෙන්නේ තමන්ගේ ජීවිත හානි/ දේපළ හානි වලක්වාගන්න විතරක්ද?

තමන්ට හැර වෙනත් පුද්ගලයෙකුට කිසිවෙකු විසින් පහරදීමක් හෝ දේපළ හානියක් කරන්නේ නම් එම අපරාධකරුවාට පහරදි ජීවිත/ දේපළ හානිය වළක්වන්න තවත් කෙනෙකුට හැකියාව තියෙනවා. වෙනත් කෙනෙකුගේ ජීවිතය අපරාධකරුවෙකුගෙන් බේරාගන්න, කාන්තාවක් ස්ත්‍රී දූෂණයකින් ගලවාගන්න, කෙනෙකුව බරපතල තුවාල කිරීමකින් බේරාගන්න, පිටස්තර පුද්ගලයෙකුගේ දේපළ සොරකමකදී දේපළ ආරක්ෂා කිරීමට (පිටස්තර පුද්ගලයා විශේෂයෙන් ආධාර නොඉල්ලුවද) බලය පාවිච්චි කරලා අපරාධකරු මෙල්ල කිරීමට සාමාන්‍ය පුරවැසියාට අයිතිය තියෙනවා.

රජයේ නිළධාරියෙක් විසින් අත්අඩංගුවට ගැනීමකදී පුද්ගලික ආරක්ෂාවේ අයිතිය...

පොලිස් නිළධාරියෙකු හෝ හමුදා නිළධාරියෙකු අත්අඩංගුවට ගැනීමකදී හෝ රඳවාගෙන පහරදීමක් කරන අවස්ථාවකදී ඊට විරුද්ධ ව එම නිළධාරීන්ට පහරදීමට කිසිවෙකුට අයිතියක් නැහැ. මරණ බියක් හෝ බරපතළ තුවාල ඇතිවීමේ බියක් දැනුනද එම නිළධාරීන්ට පහරදීමට කිසිවෙකුට අයිතියක් ලැබෙන්නේ නැහැ.

පුද්ගලික ආරක්ෂාවේ අයිතිය භාවිතා කරමින් අපරාධකරුවෙකු මරාදැමිය හැකි අවස්ථා...

1. මරණීය පහරදීමක් සිදුවනවිට
2. බරපතල තුවාල සිදුවිය හැකි පහරදීමකදී
3. ස්ත්‍රී දූෂණයක් සඳහා තැත්කිරීමකදී
4. බලහත්කාරී ව අස්වාභාවික ලෙස කාමය සංසිඳවාගැනීමේ(සමලිංගික) ක්‍රියාවකදී
5. පැහැරගෙන යාමක් සිදුවනවිට
6. අයුතු ලෙස සිරකරගෙන සිටින අවස්ථාවකදී(නිදහස් කරගැනීමට රජයේ නිළධාරීන්ගේ සහය ලැබීමට ඉඩ නොමැති විට )
7. කොල්ලකෑමක් සිදුවනවිට
8. රාත්‍රියේ ගෙවල් බිඳීමක් සිදුවන විට
9. මනුෂ්‍ය වාසස්ථානයක් ගින්නෙන් හෝ පුපුරණ ද්‍රව්‍ය යොදා විනාශ කරනවිට

පුද්ගලික ආරක්ෂාවේ අයිතිය භාවිතා කරමින් අපරාධකරුවෙකුට බරපතල තුවාල සිදුකළ හැකි අවස්ථා...

ඉහත අවස්ථාවලට නොවැටෙන සොරකම, අනර්ථය(අලාභහානි), සාපරාධී ඇතුළුවීම්, යන අවස්ථාවලදී අපරාධකරුවාට පහරදී ජීවිත සහ දේපල ආරක්ෂා කරගැනීමට සාමාන්‍ය පුරවැසියාට අයිතිය ඇත.

පුද්ගලික ආරක්ෂාවේ අයිතිය සඳහා වන සීමාවන්...

ඉහත සඳහන් කළ අවස්ථා සඳහා පමණක් …පුද්ගලික ආරක්ෂාවේ අයිතිය ලැබෙනවා. වරදක් සිදුවීමේ කාර්යයක් ඇතිබවට සාධාරණව කල්පනා කළ හැකි තත්වයක් ඇති වූ විට …පුද්ගලික ආරක්ෂාවේ අයිතිය ආරම්භ වෙනවා. ඒ කියන්නේ අපරාධකරුවා ක්‍රියාත්මක වීමට පෙර ම වුණත් …පුද්ගලික ආරක්ෂාවේ අයිතිය භාවිතා කරලා අපරාධකරුට පහර දෙන්න පුළුවන්. නමුත් අපරාධකරුගෙන් වෙන තර්ජනය පහ වුණ විගසින් ම, එහෙමත් නැත්තම් අපරාධකරු අඩපණ වුණ සැනින් ම පහරදීම නතර කරන්නෝන. මොකද සමහරවෙලාවට හොරෙක් ව එහෙම අල්ලගත්තම මැරෙනතුරු හැමෝම එකතුවෙලා පහරදෙන වෙලාවල් තියෙනවානේ. ඒ දේවල් නම් අනුමත කරන්න බැහැ. ඒ බව බැරිවෙලාවත් ඔප්පු වුණොත් අනියම් මිනීමැරුම් සඳහා චෝදනා එල්ලවීමේ හැකියාව තියෙනවා.

පුද්ගලික ආරක්ෂාවේ අයිතිය ඉක්මවා ගියවිට...

අපරාධය වැළැක්වීමට අවශ්‍ය වන අවම ප්‍රමාණයට වඩා බලය පාවිච්චි කළ විටදී හෝ ඒ ගැන පොලීසියට දැන්වීමට උවමනා තරම් අවකාශ තිබියදීත් එසේ නොකර සැකකරුවෙකුට පහරදී හෝ මරාදමා ඇති විටකදී එසේ පහරදෙන්නා/දෙන්නන් අපරාධ වරදක් සිදුකරයි. එසේ පුද්ගලික ආරක්ෂාවේ අයිතිය අයුතු ලෙස භාවිතා කළ විටදී අනියම් මිනීමැරුම්/ බරපතල තුවාල සිදුකිරීම් වැනි චෝදනා වලට අධිකරණය මඟින් දඬුවම් නියම කිරීමෙ හැකියාව ඇත.

ප.ලි: සාමාන්‍ය නීතිය කියන විෂය මම ඉගෙනගන්න කැමතියි. ඒ ගැන ලියවිලා තියෙන පත්තර කෑල්ලක්වත් මම මම නොකියවා ඉන්නෙ නැහැ. කාමරේ මේසේ අස් කරද්දි දැක්කා අවු 6 ක් විතර පරණ පත්තර කෑල්ලක්. නීතීඥ අජිත් පෙරේරා මහත්තයත් එක්ක තිබුණ සාකච්ඡාවක් ගැන. මේ ඒ සංවාදය තමයි.
…එන්නට නොහැකි වුණත් සයිබරයේ සිහින අවුරුදු උළෙල සාර්ථක වේවා කියලයි මගේ පැතුම!

25 දෙනෙකුට හිතුණ දේවල්:

Post a Comment

කමෙන්ටුවකින් දෙන්න පොඩි තල්ලුවක්. පෝස්ටුව ගැන හිතට හිතෙන දැනෙන ඕනෙ ම දෙයක් ලියන්න මෙතැන තමයි තැන ඔන්න.... හිතේ සතුට තමයි වටින්නේ !

Laptop හොරු අල්ලමු.... සහ මගේ 100!


අළුත් අවුරුද්දත් කට ළඟටම ඇවිල්ලා නේද... හැබැයි මේ සැරෙ වෙනදාට කෑගහන කොහා නම් ආවෙවත් නැහැ. කොහාට අමතක වෙලාද නැත්තම් කොහා කෑගහනවා අහගෙන ඉන්න අපට වෙලාවක් නැති තරමට අපි කාර්යබහුල වෙලාද මන්දා. දවසින් දවස මිනිස්සු අතේ සල්ලි හිඟවෙන්න පටන් අරන් වගේම බඩු මිලත් රොකට් වේගෙන් ඉහළ යන්න පටන් අරන්. ඒක දැන් පසුගිය අවුරුදු කිහිපයකම ඉඳන් දකින්න ලැබෙන දෙයක් මට නම්. තව විදියකින් කිව්වොත් ඇති නැති පරතරය වේගයෙන් වැඩිවෙමින් තියෙනවා. එකී මෙකී නොකී ප්‍රශ්න මැද්දේ අවුරුදු කන මිනිස්සු අවුරුදු ඉවර උණාම කියන්නේ අවුරුද්දක් ඇවිත් අපිව කාලා ගියා කියලයි. මිනිස්සු කීයටවත් හිතන්න කැමති නැහැ තමන්ගේ කළමණාකරණය හරි දුර්වලයි කියලා. මාස ගාණක් පුරාවට මහන්සියෙන් හරිහම්බ කරගත්ත සල්ලි ටික එක විනාඩියෙන් වියදම් කරලා දාන්න අපේ අය හරිම සූරයෝ නේ.

මේ අවුරුදු කතන්දර නිසා කියන්න ආව දේත් අමතක වුණානේ. අද කියන්න යන්නේ අපේ පරිගණකය හරි ස්මාට් ජංගම දුරකතනය හරි නැතිවුණොත් සොයාගන්න උදව් කරන අපූරු මෘදුකාංගයක් ගැනයි. සොරකම් කළ device එක අන්තර්ජාලයට එක් කල සැණින් සියළු තොරතුරු ලබාදෙන්න මේ මෘදුකාංගයට හැකියාව තියෙනවා. මේ මෘදුකාංගයේ නම Prey. සාමාන්‍ය පරිගණක වැඩසටහනක් විදියටම බාගත කරගෙන පරිගණකයේ ස්ථාපනය කරගන්න. ඊටපස්සේ Start මෙනුවෙන් ගිහින් Prey වැඩසටහන විවෘත කරගන්න.


එතකොට විවෘත වෙන්නේ Prey Configurator වින්ඩෝව. දැන් රූපයේ තියෙන විදියට Setup reporting method තෝරලා Next යන්න. ඊළඟ වින්ඩෝවෙන් Prey+Control Panel තේරීම දෙන්න. Next යන්න. අපි තාමත් අළුත් නිසා New User දීලා සාමාන්‍ය විදියට ෆෝම් එක පුරවලා එකවුන්ට් එක Create කරගන්න. දැන් ඊමේල් ගිණුමට ලොග් වෙලා බලන්න Confirmation ඊ-මේල් එකක් ඇවිත් ද කියලා. දැන් activation link එක ක්ලික් කළා ම ඔයාට යන්න පුළුවන් එයාලගේ වෙබ් පිටුවට. එතනදි ඔයාගේ User name, Password නිවැරදි ව ලබා දීලා ලොග් වෙන්න. දැන් පෙන්නාවි ඔයාගේ device එක ගැන විස්තර සේරම.


දැන් අපි බලමු බැරිවෙලාවත් පරිගණකය නැතිවුණොත් මොනවද කරන්නේ කියලා. වෙනත් පරිගණකයකින් අන්තර්ජාලයේ තියෙන ඔයාගේ Prey ගිණුමට ඇතුළුවෙලා All your devices->Managing ගිහින් Missing තේරීම Yes කරන්න. ඊටපස්සේ ඔයාට ඕන නම් තව තේරීම් ගොඩක් දෙන්න පුළුවන්. නැතිවුණු පරිගණකය ගැන විනාඩි කීයකට වරක් වාර්තා කළ යුතුද, දැන් පරිගණකයේ IP address එක මොකක්ද, ආදි වශයෙන්. Webcam තේරීම ON කළොත් දැනට භාවිතා කරන කෙනාගේ ඡායාරූපයක් පවා ඊ-මේල් එකවුන්ට් එකට ගෙන්වා ගන්න පුළුවන්. මීට අමතරව නැතිවුණු පරිගණකය lock කරන්න, alarms, alerts යවන්න එහෙමත් පුළුවන්. මේ සමහර තේරීම් කරද්දි ඒකෙන් වෙන්නෙ මොකක්ද කියලා හොඳට කියවලා බලලා කරන්න අමතක කරන්න එපා.

කාටහරි හිතෙන්න පුළුවන් හොරා පරිගණකය Format කළොත් මොකද වෙන්නේ කියලා. ඒකට උත්තරේ දැනගන්න ඕනේ නම් මේ පෝස්ට් එක ගිහින් බලන්නකෝ.

*******************************************************************************

දැන් කියන්න යන්නේ නම් ටිකක් විශේෂ දෙයක් වගේ ම කලින් කිව්ව මාතෘකාවට සම්බන්ධ නැති දෙයක් ගැනයි. මේ ලියවෙන්නේ ලාහිරු දහසක් දිලී බ්ලොගයේ සියවන සටහනයි. මේ සටහන් සියය අකුරු කරන්න මට අවුරුදු එක හමාරකට ටිකක් අඩු කාලයක් ගියා. මුලින් ම පටන්ගත්තේ තාක්ෂණික සහ විනෝදාස්වාද හෙඩිම යටතේ. පොඩි පොඩි හැලහැප්පීම් තිබුණත් ඔය හෙඩිං දෙක අතරේ දෝලනය වෙවී ලියන්න තමයි උත්සහ කළේ. මුල් කාලේ නම් සටහන් වලට ප්‍රතිචාර හරිම අඩුයි. ප්‍රතිචාර නැති ඒවත් නොතිබුණා නෙවෙයි. අදට වුණත් මහා ලොකු කමෙන්ට් ප්‍රමාණයක් නැතිවුණත් ඒ ලැබෙන කමෙන්ට් ටිකේ ගුණාත්මක බව ගැන මම තෘප්තිමත්. ගොඩක් දෙනෙකුට යම් යම් තාක්ෂණික විදියට උදව් කරන්නත් ලැබීම මට ලොකු සතුටක්.

මේ තරම් දුර ආව ගමනේ උදව් කළ අයනම් ගොඩයි. හැමදෙනාගෙම බැරිවුණත් ටිකදෙනෙක් හරි නම් කියන යුතුකමක් මගේ. හැමදාම මගේ ළඟ ඉඳන් මාව දිරිමත් කරන මගේ පුංචි හා පැටික්කිට, ආදරණීය කෝච්චියා වෙන ගෙහාන් චන්දික සොහොයුරාට, ඉස්සර මේ පැත්තේ ඇවිත් ගිය පන්සල් හන්දිය ලියන කල්හාර අයියාට, පීටර්සන් අයියට, සිතක සංකල්පනා ලියන මධුරංග සහෝ ට, රාජ් ගේ නවාතැන ලියන රාජ් අයියට, පහන් යාය ලියන සයුරි අක්කට, රූ සිරිනි ලියන රූ අක්කට, අසරණයා ලියන අසාර් ට, වර්ණයට පාට තවරන දිනේශ් මලයට, නොදුටු ලොවක් ලියන බණ්ඩාර අයියට වගේම හොස්ටල් එකේ මගේ රූමා වෙන කණිෂ්කටත් ගොඩක් ස්තූතියි සෑහෙන කාලයක ඉඳන් මාත් එක්ක රැඳිලා හිටියට. ඊට අමතරව සිත් රූ, පැතුම්, නෙත්පානි, දිනූක, ශානි නංගිට, වර්ණාට, සිහින මතකයන්, නොහිම් සිහින, හිරු... වගේ නම් කිව්ව නොකිව්ව ගොඩක් අයත් මගේ සටහන් කියවනවා. එයාලටත් ගොඩක් ස්තූතියි. නම් නොකිව්ව අය ඉන්නවනම් තරහාවෙන්න එපෝ...(අළුත් අවුරුද්දේ තරහා හිතේ තියාගන්නත් හොඳ නෑ ඕං)...

එහෙනම් සංතෝසෙටත් එක්ක ම අවුරුදු මේසෙටත් ගොඩවෙලා මොනාහරි කාලා ප්ලේන්ටියකුත් බීලා ම යන්නත් අමතක කරන්නෙපා...


ඔයාලා හැමෝටම යහපත් වූ පින් සිතිවිලි ම වැඩෙන සුබ නව වසරක් වේවා...........

34 දෙනෙකුට හිතුණ දේවල්:

Post a Comment

කමෙන්ටුවකින් දෙන්න පොඩි තල්ලුවක්. පෝස්ටුව ගැන හිතට හිතෙන දැනෙන ඕනෙ ම දෙයක් ලියන්න මෙතැන තමයි තැන ඔන්න.... හිතේ සතුට තමයි වටින්නේ !

ලෝක කාන්තා මහා සම්මේලනය…


ඔන්න එකමත් එක කාලෙක තිබුණලු ලෝක කාන්තා මහා සමුළුවක්… මේක අවුරුද්දක් අවුරුද්දක් ගානේ වරද්දන්නේ නැතිව පවත්වගෙන යන එකක්ලු. මේ කතාවට අදාල සමුළුව නම් පැවැත්වුනේ මේ දවස් වල වැඩිපුරම කතා බහට ලක් වෙන ස්විට්සර්ලන්තේ ජිනීවා නුවරලු…

කොහොමින් කොහොම හරි න්‍යාය පත්‍රයට අනුව සමුළුව පටන් අරගෙන ඉස්ඉස්සෙල්ලාම තිබුණේ පසුගිය සමුළු වාරයේදී සම්මත කරගත්ත යෝජනා ක්‍රියාත්මක වීම පිලිබඳව ප්‍රගතිය සමාලෝචනය කිරීමලු. ඔන්න ඉතිං මූලාසනයේ හිටපු සභාපතිනිය, ඒ කියන්නේ ස්විට්සර්ලන්තේ කාන්තා අයිතීන් පිළිබඳ නියෝජිත වරිය වැඩේ පටං ගත්තලු…

“හොඳයි අපිට අද මුලින්ම කරන්න තියෙන්නේ පසුගිය සභා වාරයේදී සම්මත කරගත්ත යෝජනා සහ ඒවා ක්‍රියාත්මක කල ආකාරය ගැන සාකච්ඡා කිරීමයි. ඒ කතිකාවතේ හැටියට පසුගිය යෝජනා වල තිබුණු අඩුපාඩු සහ අළුතින් කල යුතු කාර්යයන් පිළිබඳව අදහසක් ගන්න පුළුවන් වේවි. අපි ගියවර සම්මත කරගත්ත යෝජනා වල මුලින්ම තිබුනේ “තමුන්ගේ වැඩ වලින් කොටසක් පුරුෂයාට පැවරිය යුතුයි” යන්නයි. මම මේ පිළිබඳව මුලින්ම අදහස් දක්වන්න කියලා ආරාධනා කරනවා අපේ ඇමරිකානු නියොජිත වරියට.

සභාවේ උණුසුම් පිළිගැනීමත් එක්කම සෑහෙන අත්පුඩි ගානකුත් වැදුනට පස්සේ ඇමරිකන් නියෝජිත වරිය නැගිටලා ගියාලු ප්‍රධාන වේදිකාවට, බොහොම ආඩම්බරෙන්… තමන් අර කියපු යෝජනාව ක්‍රියාත්මක කරපු හැටි ගැන දැන් මේ නෝනා දේශනයක් කරනවලු…

“මම එදා ගෙදර ගිය ගමන් මගේ මහත්තයට කිවුවා… මින් මත්තට මම තමුසෙගෙ රෙදි හෝදන්නේ නැහැ… කොහොම හරි කරලා තමුසෙගේ රෙදි ටික තමුසෙම හෝදගන්නවා!! කියලා…. හැබැයි මට පළවෙනි දවසෙ නම් මොකවත් අමුත්තක් පෙනුනේ නැහැ… දෙවෙනි දවසෙත් කිසි දෙයක් පෙනුනේ නැහැ… ඒත් තුන් වෙනි දවසේ මම දැක්කා මහත්තයා එයාගෙ රෙදි ටිකයි මගේ රෙදි ටිකයි ඔක්කොම එකතු කරගෙන තනියම හෝදනවා… ඉතිං හැමෝටම මේ වගේ පුරුෂාධීපත්‍යයට යට වෙන්නේ නැතිව ඉන්න පුළුවන් කම ලැබෙන්න ඇති කියලා මම හිතනවා…

මෙහෙම කියපු ඇමරිකන් නෝනට සෑහෙන ප්‍රතිචාරයක් ලැබුනලු සභාවෙන්… ඊළඟට උදා වුනේ එංගලන්ත නියෝජිත වරියගේ අවස්ථාවලු… එයත් තමුන් ගේ පුරාජේරුව සභාවට කියලා දැම්මලු…

“මමත් ගෙදර ගිය ගමන් මහත්තයට කිවුවා “ආයෙ නම් මට මේ ළමයි බැලිල්ල කරන්න බැහැ… තමුසේටනේ මෙච්චර ගොඩක් ළමයි හදා ගන්න උවමනාව තිබ්බේ… දැන් ඒක හින්දා ළමයින්ගේ වැඩ ටික තමුසේම කරනවා.. මට නම් ආයෙ කියන්න එපා ඕවා කරන්න හොඳද!!…” කියලා. මටත් පළවෙනි දවසේ කිසි දෙයක් වෙනවා පෙනුනේ නැහැ. දෙවනි දවසෙත් කිසි දෙයක් පෙනුනේ නැහැ… ඒත් මෙන්න තුන්වෙනි දවසේ මේ මනුස්සයා ළමයි ටික නාවලා.. කවලා.. පොවලා… ඉස්කෝලෙටත් ගිහිල්ලා දැම්මා… ඒ මදිවට ළමයින්ගේ ගෙදර වැඩ ටිකත් කරලා දෙනවා… දැන් නම් මම ඒ කරදරෙන් නිදහස් වෙලයි ඉන්නේ…

මේ කතාව අහපු සභාවෙ කට්ටිය ඇමරිකන් සුද්දිට දුන්නට වඩා චියර් පාරක් දුන්නලු එංගලන්තෙ සුද්දිට… දැන් තියෙන්නේ මැදපෙරදිග නියෝජිත වරියගේ අවස්ථාවලු. අරාබි නෝනත් කළුවට කළුවේ ඇඳගෙන බොහොම හෙමින් සැරේ වේදිකාවට ගොඩ වුනාලු තමුන්ගේ කතාව සභාගත කරන්න.

“කලින් වතාවෙ ඉදිරිපත් වෙච්ච යෝජනාවෙ විදියට මමත් ගෙදර ගිය ගමන් මහත්තයට කිවුවා “මීට පස්සේ මට නම් කියන්න එපා තමුසෙගේ කෑම හදන්න කියලා… තමුසේ කන විදියකට කනවා… මම මින් මත්තට කෑම හැදුවෙත් හදන්නේ මට කන්න විතරයි. තමුසෙට කන්න ඕනෙ නම් තමුසේ උයාගෙන කනවා!!…” කියලා. මටත් අනිත් හැමෝටම වගේ පළවෙනි දවසෙදි නම් මෙලෝ දෙයක් පෙනුනේ නැහැ…. දෙවෙනි දවසෙත් කිසිම දෙයක් පෙනුනේ නැහැ… ඒත් තුන් වෙනි දවසේදි මට යාන්තමට වගේ ඇස් අරින්න පුළුවන් වෙනකොට දැක්කා Hospital එකේ සිවිලිමේ කැරකෙන ෆෑන් එක...!”



ප.ලි: උපුටා ගැනීම ඊයකිනි.

ප.ලි 1: මෙය හුදෙක් කාන්තා පාර්ශවයට අපහාස කීරීමට ලියන ලද්දක් නොවන බවට කරුණාවෙන් සලකන්න!

36 දෙනෙකුට හිතුණ දේවල්:

Post a Comment

කමෙන්ටුවකින් දෙන්න පොඩි තල්ලුවක්. පෝස්ටුව ගැන හිතට හිතෙන දැනෙන ඕනෙ ම දෙයක් ලියන්න මෙතැන තමයි තැන ඔන්න.... හිතේ සතුට තමයි වටින්නේ !

වලිගය පාගාගෙන ද ඉන්නෙ???



අපි දෙයක් තේරුම් ගන්නකොට කොයිතරම් නම් සැලකිලිමත් වෙන්නෝනද, අපි එක දවසක් ඇතුළත කොයිතරම් දේවල් නම් අහනවද දකිනවද නේද... අර කියමනකුත් තියෙන්නේ 'කියන්නා කෙසේ කීවත් අසන්නා සිහිබුද්ධියෙන් ඇසිය යුතුයි' කියලා. අපි අතර කොයිතරම් ඉන්නවාද තම තමන්ගේ පුද්ගලික මතවාද සමාජයේ වපුරන්න හදන අය. තමන් විතරයි හරි, අනිත් අය වැරදියි කියාගෙන. ඒවා සමහර වෙලාවට හරි වෙන්නත් පුළුවන් වරදින්නත් පුළුවන්. ඒ දේවල් නිවැරදි නම් ගැටළුවක් නෑ, නමුත් වැරදි දෙයක් නම් අනුගමනය කලාට පස්සේ වෙන හානිය දරන්න වෙන්නේ අපිටමයි. ඒ නිසා හැමදෙයක් ම තුළින් නිවැරදි දේවල් ම ජීවිතේට ගන්න තරම් අපි දක්ෂ වෙන්නෝන. හරියට කිරි මිශ්‍ර දියෙන් කිරි විතරක් ම වෙන් කරලා ගන්න 'ස්වර්ණ හංසයා' වගේ!

දවසක් බුදුරජාණන් වහන්සේ භික්ෂූන් වහන්සේලාත් එක්ක කොසොල් ජනපදයේ චාරිකාවේ වැඩම කරමින් ඉද්දි කාලාම වැසියන්ගේ නියම්ගම වුණ කේසපුත්තයට වැඩම කළා. එහිදී කාලාම වරු බුදුරජාණන් වහන්සේට කිව්වේ සැරින් සැරේ එහි එන විවිධ ආකාරයේ බ්‍රාහ්මණයෝ, පණ්ඩිතයෝ, ශාස්තෲවරු තමන්ගේ මතය විතරක් හරි, අනිත් සියල්ල වැරදී කියලා ඔප්පු කරන්න හදනවා, ඉතින් අපි කොහොමද නිවැරදි ම දේ, ඒ කියන්නේ ඇත්ත කියන්නේ කවුද බොරු කියන්නේ කවුද කියලා තෝරාගන්නේ කියලා...ඉතින් බුදුරජාණන් වහන්සේ දේශනා කරලා තියෙනවා කාලාම වරු සැක කළයුතු තැන ම නිවැරදි ලෙස සැක කරලා තියෙනවා. ඒ නිසා මේ විදියට හරි දේ තෝරාගන්න කියලා.

කාලාමවරුනි, ඔබ කටකතාවෙන් ආවා කියලා යමක් පිළිගන්න එපා. ඒ කියන්නෙ දෙයක් ඇසූ පමණින් පිළිගන්න එපා කියලා. පරම්පරාවෙන් ආවා කියලත් පිළිගන්න එපා කියනවා. දහම් පොත් වල තිබුණ පණින් පිළිගන්න එපා. තර්කයට ගැලපුන පමණින් පිළිගන්න එපා, න්‍යායට ගැලපෙනවා කියලා පිළිගන්න එපා, කරුණු සලකා බලනකොට ගැලපෙනවා කියලා පිළිගන්න එපා, පිළිගත යුතු කෙනෙක් කියනවා කියලත් පිළිගන්න එපා කියනවා, මේ ශ්‍රමණයා අපගේ ගුරුවරයා ය කියලත් පිළිගන්න එපා කියනවා.

ඊටපස්සෙ බුදුරජාණන් වහන්සේ මේ විදියට දේශනා කරනවා. මේ මේ දේවල් අකුසල්, මේ දේවල් වරදින් යුක්තයි, මේ දේවල් ප්‍රඥාවන්තයන් ගේ ගර්හාවට ලක්වෙනවා, මේ දේවල් අහිත පිණිස, දුක් පිණිස පවතිනවා කියලා තමන්ට ම වැටහෙනවා නම් අතහරින්න කියලා.

මෙතනදි විශේෂ දෙයක් කියන්නෝන, "මේ ශ්‍රමණයා අපගේ ගුරුවරයා ය කියලත් පිළිගන්න එපා" කියන අවස්ථාවේ ශ්‍රමණයා කියලා එතනදී අදහස් කරලා තියෙන්නේ ඒ කාලේ ඉන්දියාවේ වාසය කල අනෙකුත් ශ්‍රමණයෝ වුණ අචේලකයෝ, ජටිලයෝ, නිඝණ්ඨයෝ ආදී හැම කෙනාමත් ඇතුළත්වයි. බුදුරජාණන් වහන්සේ දේශනා කරන දේ අහලා නුවණින් විමසලා ඒ අනූව කටයුතු කරන්න කියලයි උන්වහන්සේ දේශනා කරන්නේ. මේ වටින ධර්ම කරුණු ඇතුළත් වෙලා තියෙන්නෙ අංගුත්තර නිකායේ තික නිපාතයේ තියෙන කාලාම සූත්‍රයෙයි.

අද බක් පුර පසළොස්වක පෝය දවස, අප තථාගත බුදුපියාණන් වහන්සේ, ලෝක සත්වයාට සාමයේ පණිවිඩය පසක් කර දුන් වැදගත් අවස්ථාවක් හා ආදර්ශයෙන් ඔප්පු කළ ඉතා වැදගත් පොහොය දවසක්. බුදුරජාණන් වහන්සේ දෙවන වරට ලංකාවේ නාගදීපයට වැඩියෙ බක් පෝය දිනයි. මැණික් පුටුවට යුද්ධයකට එළඹුනු චූලෝදර මහෝදර නා රජුන් සමගි කරවීම තමයි එදා වුණ විශේෂ සිදුවීම. ඒ ගැන විස්තර කියන්න යන්නේ නැහැ, ඒ ගැන ඔයාලා දන්නවනේ නේද. මේ පෝය දින විශේෂ පෝස්ටුවක්. කලින් පෝය දින විශේෂ සටහන් මෙතනින් බලන්න යන්න පුළුවන් කැමති අය ඉන්නවා නම්. මේ සටහන කියවලා ඔයා යමක් ජීවිතේට ගත්තා නම් ඒක තමයි මගේ සතුට. මේ දහම් කරුණු ධර්මාවබෝධයට මාර්ගයක් කරගන්න අධිෂ්ඨාන කරගන්න මහන්සි ගන්න. ඔයාලා හැමෝටම තෙරුවන් සරණයි.

18 දෙනෙකුට හිතුණ දේවල්:

Post a Comment

කමෙන්ටුවකින් දෙන්න පොඩි තල්ලුවක්. පෝස්ටුව ගැන හිතට හිතෙන දැනෙන ඕනෙ ම දෙයක් ලියන්න මෙතැන තමයි තැන ඔන්න.... හිතේ සතුට තමයි වටින්නේ !