ගුටි කෑමෙන් ඉගෙන ගැනීම හෙවත් පළමු පාඩම...!



අම්මෝ... ගුටි කන ඒව නම් මතක් කරන්න එපා කියලා ගොඩක් අය කියයි. මොකද සමහරු කියනවනේ කෑමෙන් කෑම හොඳම කෑම ගුටි කෑම කියලා. හොඳ හොඳ හෝටල් වලින් කාලා තියෙන අය නම් මේ ගැන දන්නවා. හැබැයි ඉතින් ඉකෝලේ කාලේ එහෙම මතක් වෙලා හිනා යන වෙලාවල් එහෙම අප්‍රමාණයි. ගුටි කන එකෙත් වර්ග කීපයක් ම තියෙනවනේ. එකක් තමයි ගෙදරින් ගුටි කෑම. ඒ නම් ආදරේට ලු. ස්කෝලෙදි ගහන්නේ අපිව හදන්නලු. හැබැයි ඉතින් සමාජයෙන් අපි ව හදන්න කලින් ස්කෝලෙන් හරි ගෙදරි හරි හැදෙන එක තමයි හොඳම දේ මට හිතෙන විදියට!!!

හැබැයි මට නම් මතක ඇති කාලෙක අම්මා එක සැරයක් ගහලා තියෙනවා, මම සෙල්ලම් කරන්න යාළුවෙක් ගේ ගෙදර ගිහින් අම්මා කතාකලා ම ආවේ නෑ කියලා දර කෑල්ලකින්ම සැලකුවා. ( හිකිස්... අම්මා එතකොට දර කප කප හිටියේ!) අප්පච්චිත් එක සැරයක් ටොක්කක් ඇන්නා මතකයි. ඊට වඩා නම් කාලා නෑ. දෙවෙනි වර්ගේ තමයි ස්කෝලෙන් ගුටි කෑම. ඒ නම් ඉතින් අණ්ඩපාල වැඩ කරලා තමයි. ඒක නම් ඕන තරම්! ඒකටත් මරු මරු වැඩ තියෙනවා. සමහරු කිව්වා ඒ කාලේ කොන්ඩ ගහක් අතේ තියාගෙන ගුටි කෑවම රිදෙන්නේ නෑලු, ඒ නිසා සමහරු එහෙමත් කලා, සමහර වේලාවට ගුටි කනවා කියලා හොඳටම ෂුවර් උනා ම පොත් එහෙම කලිසම අස්සේ දාගෙන යන වෙලාවල් එහෙමත් නැත්තෙම නෑ. අතට, කණට, පස්සට කන ගුටි වලින් මම දන්න විදියට හොඳට ම රිදෙන්නේ අත අනිත් පැත්ත හරවලා, ඒ කියන්නේ පිටි අල්ලේ ඇඟිලි වලට ගැහුවා ම තමයි.(වෙනත් අත්දැකීම් ඇත්තෝ නිවැරදි කරත්වා...)

ඊළඟ ජාතිය තමයි වටෙන් පිටින් ගුටි කන එක. ස්කෝලේ කාලේ තමයි මේවා නම් ගොඩාක් ම වැඩි. ගොඩාක් ම ගෑණු ළමයින්ගේ කේස් තමයි මේවට හේතු වෙන්නේ. ඊට අමතරව ඔය ඩයල් එකේ අවුල් හින්දත් ඕනේ තරම් වලි යනවා. ඕකේ මරු ම වැඩෙ තමයි අන්තිමට වලියකදි ගුටි කන්නේ කොහේවත් යන අහිංසකයෙක් වෙන එක. හොයාගෙන යද්දි කිසි ම සම්බන්ධයක් නෑ ඒ වලියට... දැන් නම් පිහි, බයිසිකල් චේන් එහෙම අනිවාර්යයි ස්කෝලේ යද්දි මම හිතන්නේ පොත් වලට අමතරව!

ඒකෙන් මේකෙන් කියන්න ආව කතාව අමතක උනානේ... ඊයේ පෙරේදා දවසක අපේ කැම්පස් එකේ තිබ්බ ෆන්ෂන් එකකට ආවා මහාචාර්ය සරත් කොටගම මහත්තයා. ගොඩාක් අය දන්නේ අර "සිරිලක කුරුල්ලෝ" කියලා පොතක් ලිව්ව කෙනා කිව්ව ම. එතුමා කිව්ව කතාවක් තමයි මගේ හිතට වැදුනේ. ඔහු කියනවා දැන් කාලේ පොඩි උන් ඉපදෙද්දිම ගුටි කාලා ලු පළවෙනි පාඩම ඉගෙන ගන්නේ. ඒ වෙන්නේ මෙහෙමයි. දැන් කාලේ ගොඩක් අම්මලා කැමති සිසේරියන් සැත්කමකින් දරුවා උපද්දවන්නනේ. ඒකටත් හේතු ඇති ඉතින් වේදනාව අඩුකම වගේ ඒවා. ඒ ගැන නම් වැඩිවිස්තර මම දන්නේ නෑ.


දන්න කාගෙන්හරි අහගන්න එක තමයි හොඳම! සිසේරියන් කියන්නේ අර බඩේ හරස් අතට කැපුමක් කරලා ගර්භාෂය විවෘත කරලා දරුවා එලිය ගන්න ඒකනේ. හැබැයි ඔය වෙද්දි දරුවා සම්පූර්ණයෙන් ම එළියට එන්න සූදානම් නෑ, හරියට බලෙන් එළියට ගන්නවා වගේ වැඩක් ඒක. ස්වභාවික විදියට එද්දි මම දන්න විදියට දරුවාට යම් දැනීමක් තියෙනවා සිදුවෙන වෙනස්කම් ගැන. සාමාන්‍යයෙන් දරුවෙක් බිහි වුණා ම ඉස්සර වෙලා ම ඉගෙන ගන්නේ අඬන්නනේ. ඉතින් අර සිසේරියන් සැත්කමකින් එළියට ගත්ත දරුවා අඬන්නේ නැතිලු සාමාන්‍යයෙන්. ඒ නිසා ඉතින් ඩොක්ටර් දරුවා අරන් ඉස්සරවෙලා ම නර්ස් අතට දෙනවලු. නර්ස් කරන්නේ පොඩ්ඩගේ කකුල් දෙකෙන් අල්ලලා අනිත් පැත්ත හරවලා පිටට ගහන එකලු. එතකොට ලු අඬන්නේ පොඩි මෑන්. ඔන්න ඔය විදියට තමයි දැන් ඉපදෙන පුංචි එවුන් ගුටි කාලා ම වැඩ අල්ලන්නේ.

මේ කතාවේ මතුපිට අර්ථය මෙහෙම උනාට මට නම් හිතෙන විදියට ගොඩාක් ගැඹුරු තේරුමක් තියෙනවා කියලයි මට නම් හිතෙන්නේ. පොඩ්ඩක් නිවි සැනසීලේ හිතලා බලන්නකෝ ඔයාලටත් එහෙම හිතෙනවද කියලා.

ඒ වගේ ම මේ 2011 අවුරුද්දට දාන අන්තිම පෝස්ට් එක වේවි මේක. ලබන 2012 අවුරුද්ද සුබ එකක් වෙන්න, හැම බලාපොරොත්තුවක් ම ඉෂ්ඨ කරගන්න උත්සහ කරන වසරක් වෙන්න කියලයි මම නම් හැමෝටම ප්‍රාර්ථනා කරන්නේ!!! ලබන අවුරුද්ද මගෙත් බලාපොරොත්තු ගොඩක් තියෙන අවුරුද්දක්, ඒ මොකද දන්නවද... ලබන අවුරුද්දෙ කැම්පස් එකෙන් අවුට් වෙන්න ට්‍රේනින් යන්න තියෙනවා. ඒ කියන්නේ වෘත්තීය ජීවිතේ පටන් ගන්නෝන(ඒකට IT කොම්පැණියක් හොයාගන්නත් ඕන!!!). ඒත් එක්කම මගේ ජීවිතේට හැමදාම ආදරණීය හීන මවන මගේ සුදු මැණික එක්ක ජීවිතේ පුංචි සොඳුරු වෙනසක් කරන්නත් නැවුම් බලාපොරොත්තුවක් හිතේ කොනක තියෙනවා. ඒ ඔක්කොම දේවල් හිතේ තියාගෙන ම ඔන්න මමත් යනවා එහෙනම්....


හැමෝටම සුබ නව වසරක් වේවා........

11 දෙනෙකුට හිතුණ දේවල්:

Post a Comment

කමෙන්ටුවකින් දෙන්න පොඩි තල්ලුවක්. පෝස්ටුව ගැන හිතට හිතෙන දැනෙන ඕනෙ ම දෙයක් ලියන්න මෙතැන තමයි තැන ඔන්න.... හිතේ සතුට තමයි වටින්නේ !

කොළඹ ටවුන් එක ඉස්සර... ෆොටෝ ටිකක්!


දැන් කාලේ කොළඹ ටවුන් එකේ ඉන්න සෙනඟයි වාහන කන්දරාවයි අතරේ ඇඟිල්ලක් ගහන්න ඉඩ නැති වුනාට ඉස්සර කාලේ කොහොම තියෙන්න ඇතිද? ඉස්සර කාලේ කිව්වේ දැනට අවුරුදු 150 කට 200 කට කලින්. හිතාගන්න පුළුවන්ද? හිතාගන්න අමාරු නම් මේ ෆොටෝ ටික බලන්නකෝ, මට ඊමේල් එකකින් හම්බවුනේ, තරමක් දුර්ලභයි කියලා හිතුණ නිසා ඔයාලත් එක්ක බෙදාගන්න හිතුවා. බලන්නකෝ කොහොමද කියලා...


මෙතනදි තමයි ප්‍රින්ස් වීදිය සහ යෝක් වීදිය හමුවෙන්නේ, ගෆූර් බිල්ඩින් එක සහ ග්‍රින්ඩ්ලේස් බැංකුව තමයි වම් පැත්තේ තියෙන්නේ. බ්‍රිස්ටල් සහ YMBA බිල්ඩින් තමයි දකුණු පැත්තේ තියෙන්නේ. ගහ ළඟ තියෙන්නේ ප්‍රසිද්ධ කාර්ගිල්ස් සාප්පුව. ඔය වින්ටේජ් කාර් එහෙමත් නවත්තලා තියෙන්නේ...

මේ තමයි බේරේ වැව. 1900 ගණන් වල බේරේ වැව හෙක්ටයාර් 165ක් පුරා පැතිරිලා තිබුණත් දැන්නම් හෙක්ටයාර් 65ක් විතර තමයි තියෙන්නේ.


මේ කොළඹ නගරය, ෆොටෝ එක අරන් තියෙන්නේ ජනාධිපති මාවතේ, ඉස්සර නම් Queens Street එකේ ඉඳන්. බැක්ග්‍රවුන්ඩ් එකෙන් පේන්නේ බේරේ වැව සහ ගෝල්ෆේස් හෝටලය. 1505දී පෘතුගීසීනුත් 1656 දි ලන්දේසීනුත් 1815 දී ඉංග්‍රීසීනුත් අග නගරය කරගත්තේ ලේසියෙන් ම කුළුබඩු, මුතු, මැණික්, අලි කොළඹ වරාය හරහා ලේසියෙන් ම අපනයනය කරන්න පුළුවන් නිසයි.


මේ තමයි 1800 ගණන්වල ගාලු මුවදොර පිටිය...


1800 ගණන්වල තිබුණ හවුස් බෝට් එකක් තමයි මේ ඇල මාර්ග වල තිබුණ...


මේ තමයි කොල්ලුපිටියේ තිබුණ සුප්‍රසිද්ධ නුග ගස...



මේ ටවුන්හෝල් එක, අඳුරාගන්න පුළුවන්ද බලන්න...



1800 ගණන් වලදි ගාලු මුවදොර හෝටලය තිබිලා තියෙන්නේ මෙහෙමයි...


මේ වරාය තියෙන චැතැම් වීදිය...


මේ ඉහළ චැතැම් වීදීය, වරායට භාණ්ඩ ප්‍රවාහනයට පාවිච්චි කලේ කරත්ත නිසයි මේ කරත්ත ගොඩාක් තියෙන්නේ!


මේ රේස් කෝස් පිටිය ළඟ තිබුණ ආණ්ඩුකාරයාගේ නිල නිවසයි...


මේ ගෝල්ෆේස් හෝටලය ඉදිරිපසින් පෙනුමයි... දකුණු පැත්තෙන් තියෙන්නේ ගාලු පාර.


මේ යුනියන් ප්ලේස්...

15 දෙනෙකුට හිතුණ දේවල්:

Post a Comment

කමෙන්ටුවකින් දෙන්න පොඩි තල්ලුවක්. පෝස්ටුව ගැන හිතට හිතෙන දැනෙන ඕනෙ ම දෙයක් ලියන්න මෙතැන තමයි තැන ඔන්න.... හිතේ සතුට තමයි වටින්නේ !

රෑ වැඩ මුරය අවසන් වන කණිසමට...



සොච්චම් පඩියකට වහල්ලු වගේ තමන්ගේ ශ්‍රමය ඈ කැප කරන්නේ මහා මාළිගාවක් හදන්න නම් නෙවෙයි. එහෙම කරන්නේ තමන්ගේ ජීවිතේ වැරහැලි වෙන්න නොදී යාන්තම් ඉරුණු තැන්වත් වහගන්න කියලා ගොඩාක් දෙනෙක් දන්නේ නෑ. මැෂිමක සද්දෙට වඩා හයියෙන් මහා සාගරය තරම් අඬන්න පුළුවන් වුනත් දුක් කරදර හමුවේ අඬලා පලක් නැති නිසාමයි ඈ අඬන්නේ නැතුව ඉන්නේ, නැතුව මැෂිමකට වගේ හැඟීම් දැනීම් නැතුව නම් නෙවෙයි! ඒ සාගරේ සැරින් සැරේ හමන කුණාටු හරියට ඇගේ හදවතින් නික්මෙන බලාපොරොත්තු සහගත සුසුම් කිව්වොත් වැරදි නෑ මම හිතන්නේ...

ඊයේ පෙරේදා දවසක හොස්ටල් එකට විකුණන්න ගෙනාව සඟරාවක (කැම්පස් එකේ ම යාළුවෝ වගයක් හදන සඟරාවක්!) තිබුණ අපූරු සින්දුවක් දැකලා තමයි මේ දේවල් හිතුණේ. සින්දුව තමයි සුනිල් එදිරිසිංහයන් කියන "රෑ වැඩ මුරය අවසන් වන කණිසමට..." ටිකක් පරණ සින්දුවක් වගේම ගොඩක් අය අහලත් ඇති මේ සින්දුව.

රෑ වැඩ මුරය අවසන් වන කණිසමට
නුඹේ රුව පෙනෙයි පරවුණු කුසුමක් ලෙසට
අරුණලු කැරලි වැටෙනා සඳ අළුයමට
නුඹේ ලොවට රෑ වෙයි පෙර කල පවට

ලෝකේ ජීවත් වෙන ගොඩක් මිනිස්සුන්ට උදෑසනක් කියන්නේ කුරුල්ලෝ කෑගහන, මල් පිපෙන සුන්දර වෙලාවක් වුනත් මේ යුවතියන් වැඩ ඉවරවෙලා රෑ බෝ වෙන ජාමේ එළියට බහින්නේ පරවුණු මල් වගේ තැලිලා පොඩිවෙලා. යන්තම් ජීවිතේ ගැට ගහගන්න ඕන කරන පුංචි බලාපොරොත්තුවක් විතරක් හිතේ ගුලි කරගෙන උදේ ඉඳන් රෑ වෙනකල් මහන මැෂිම කරකවන ඔවුන් දවස අන්තිම වෙද්දි හෙම්බත් වෙනවා. ඒ වගේ ම තමයි හැමදාමත් උදේට ඉර පායලා හවසට ඉර බැහැලා යන්නේ තවත් අඳුරු දවසක් මතකයන් ජීවිතේට එකතු කරමිනුයි!

තුන් තිස් පැයේ දෑඟිලි නිදි වරන්නේ
නිල් එළියටයි පෙති ගෝමර තැවෙන්නේ
මල්විය නොවෙද මේ දියකර හරින්නේ
මැෂිමද හිතද මහ හයියෙන් හඬන්නේ

…ඉස්කෝලේ ගිහින් ඉවර වුන ගමන් ම ඇඟලුම් කම්හලට එන අහිංසක මල් කැකුළු වගේ තරුණියන් සොච්චම් පඩියකට රෑ එලි වෙනකල් ම දෑත් වල කරගැට එනකල් ම මහන මැෂිමට තමන්ගේ යෞවනය දියකරල දාන්නේ වෙන කරන්න දෙයක් නැති නිසා ම මිසක් ආසාවකට නම් නෙවෙයි. ගොඩක් කෙල්ලෝ ගමේ ඉන්න දෙමව්පියෝ, සහෝදර සහෝදරියෝ ජීවත් කරන්නෙත් ඔය මැෂිම කරකවලා තමයි. ඒ නිසාමද මන්දා ඇගේ හිත මහ හයියෙන් හඬනවා කියලයි පද රචකයා කියන්නේ.

නුඹේ කඳුලැලි ද සයුරේ රැළි නඟන්නේ
හද සුසුමන් ද පවනක් වී හමන්නේ
තනි නොතනියට සෙවනැල්ලද සිටින්නේ
ඇඳුම ද නුඹේ ජීවිතය ද මහන්නේ

විවෘත ආර්ථිකයේ ප්‍රතිඵලයක් විදියට අපේ රටට ප්‍රේමදාස ජනාධිපතිවරයා ගේ කාලේ දි හඳුන්වා දුන්න ඇඟලුම් කම්හල් සංකල්පය නිසා ම සෘජු හා වක්‍ර ප්‍රතිඵල රාශියක් ලැබුණා. ඒකේ වාසි වගේ ම අවාසිත් නැත්තේ ම නෑ. ඉස්කෝලේ ගිහින් කැම්පස් යන්න රිසාල්ට්ස් මදි වෙලා හෝ දුප්පත් කම නිසා ම ඉහළට ඉගෙන ගන්න බැරිවෙන කෙල්ලොන්ට අන්තිමේට පිහිට වෙන්නේ ටවුන් එකේ තියෙන ඇඟලුම් කම්හල ම තමයි. නැත්තම් ඔය කෙල්ලෝ මහ පාරේ තමයි කියලයි මටනම් හිතෙන්නේ. සිහින ගොඩාක් මවලා අහසේ මාලිඟා හදන්න පෙරුම් පුරාගෙන ටවුන් එකේ ඇඟලුම් කම්හලට රැකියාවට එන කෙල්ලෝ අන්තිමේට කුකුල් කූඩු වගේ බෝඩිම් වල, හරියට කෑමක් නැතුව, ඇඟට ලස්සන ඇඳුමක් නැතුව ගෙවන ජීවිතේ හරියට මිහිපිට අපායක් වගේ. සමහර වෙලාවට සමහර කෙල්ලෝ හොරුන් ට කුඩුකාරයන් ට අහුවෙලා දුක් විඳින්නේ නොදැනුවත්කම නිසාම ද මන්දා. සමහර වෙලාවට අඩු වැටුපකට ශ්‍රමය විකුණනවා මදිවාට කෙල්ලන්ට තමන්ගේ සිරුර පූජා කරන්න වෙන්නෙත් ඔය පවතින කටුක පරිසරය නිසාද කියලත් වෙලාවකට හිතෙනවා.

ඔය දේවල් දැක්ක බන්දුල නානායක්කාරවසම් කියන විශිෂ්ඨ ගණයේ පද රචකයාගේ තෙළි තුඩින් නිමවුණු, රෝහණ වීරසිංහයන්ගේ අපූරු සංගීතයෙන් හැඩගැන්වුණු සුනිල් එදිරිසිංහයන්ගේ අපූරු කටහඬ මේ ගීතයට චමත්කාරයක් එක් කරනවා.

දැන් නම් පිටරට ආයෝජකයන්ට පින් සිද්ධ වෙන්න යහපත් ජීවන තත්වයක් තියෙන ඇඟලුම් කම්හල් අපේ රටෙත් තියෙනවා. එහෙම පහසුකම් වැඩ කරන අයට දුන්නේ නැත්තම් තමන්ගේ ඇඟළුම් ඇණවුම් ඒ ආයෝජකයන් ප්‍රතික්ෂේප කරන නිසාම තමයි එහෙම වෙලා තියෙන්නේ. ඉස්සර ටැප් එකෙන් වතුර බොන්න තිබුණු කම්හල් වල දැන් හොට් වෝටර්, කූල් වෝටර් පහසුකම්, ඉයර් ප්ලග්ස් තියෙන්නේ ඒ නිසාම තමයි. වටපිටේ ලස්සනට මල් වවලා තියෙන්නෙත් ඒ නිසාමයි. ඒ වුනත් ඒ පහසුකම් හැම තැනම ව්‍යාප්ත වෙලා නෑ කියන එකත් පිළිගන්න ඕන...ගොඩක්දෙනා පිලිගන්න අකමැති යථාර්තයක් තමයි ඇඟළුම් සේවිකාවොත් මේ රටේ කොටසක් කියන එක. සමහරවිට ඒ අය උගත් කමින් අඩු ඇති . නමුත් ඒ අයත් මිනිස්සු බව අමතක කරන්න නරකයි...

15 දෙනෙකුට හිතුණ දේවල්:

Post a Comment

කමෙන්ටුවකින් දෙන්න පොඩි තල්ලුවක්. පෝස්ටුව ගැන හිතට හිතෙන දැනෙන ඕනෙ ම දෙයක් ලියන්න මෙතැන තමයි තැන ඔන්න.... හිතේ සතුට තමයි වටින්නේ !

ලාබයි...ලාබයි... කාබයිඩ් එක්ක පළතුරු ලාබයි.....!




ටවුන් එකේ පේමන්ට් එකක ඇවිදගෙන යනගමන් බැරිවෙලාවත් පළතුරු ලෑල්ලක් දිහා බැලුවොත් ඇති , ඒ ලෑල්ලේ තියෙන පළතුරු දෙක තුනක් ෂොපින් එකකට දාලා දෙන මට්ටමට අපේ වෙළෙන්දෝ දියුණුයි දැන්. ඒ එයාලා අපේ පෝෂණය ගැන ගොඩාක් උනන්දු නිසාද කියලා කියන්න නම් මම දන්නේ නෑ. එයාලා හිතනවා ඇති නිරෝගී කෙනෙක් දවසකට පළතුරු 300g-400g වත් කෑමට ගන්නේ නැත්තම් හරිම වැරදියි කියලා! පළතුරු වෙළෙන්දෝ පැත්තකින් තියමුකෝ, මේ එළවළු වෙළෙන්දෝ එක්ක නම් මට හරිම තරහයි ඊයේ පෙරේදා දවසක ඉඳන් , ඒ මොකද දන්නවද? ඊයේ පෙරේදා දවසක අපේ ගෙදරට ගෙනාව තක්කාලි ගෙඩි වලටත් මේ මිනිස්සු රසායනික(කාබයිඩ්) දාලානේ. හොයාගත්තේ කොහොමද කියලා පස්සේ කියන්නම්කෝ... හැබැයි ඔයාලා දන්නවනේ මේ කාබයිඩ් කියන රසායනිකය අහිතකර එකක් කියලා. බලමු මේ කාබයිඩ් කියන්නේ මොකක්ද කියලා!

කාබයිඩ් කියන්නේ CaC2 කියන රසායනික සංයෝගය. සාමාන්‍යයෙන් මේ කාබයිඩ් පළතුරු/එළවළු වලට එකතු කරන්නේ ජලයත් එක්ක එකතු කරලා. එතකොට සිද්ධ වෙන්නේ මේ රසායනික ප්‍රතික්‍රියාව,
CaC2+ H2O --> Ca(OH)2 + C2H2

ඒකේ ප්‍රතිඵලයක් විදියට කැල්සියම් හයිඩ්‍රොක්සයිඩ් සහ ඇසිටලීන් වායුව නිකුත් වෙනවා. කලින් සඳහන් කල කැල්සියම් හයිඩ්‍රොක්සයිඩ් පළතුරු ලෙල්ල මත තැන්පත් වෙනවා වගේම ලෙල්ල ඇතුලට වුනත් කාන්දු වෙන්න ඉඩ තියෙනවා. හිතන්නකෝ ඇපල් වගේ පළතුරකට කාබයිඩ් වලින් වෙන හානිය!! ඊට අමතරව බැරලෝහ (ආසනික්, කැඩ්මියම්... ) වගේ දේවලුත් මේවා කන අපේ ඇඟ ඇතුළට ඇතුළු වීමේ අවදානම තියෙනවා. මේ බැරලෝහ කියන්නේ උග්‍ර විෂ කියලා හිතාගන්නකෝ ඒ ගැන ලොකු දැනුමක් නැත්තම්. මේ බැර ලෝහ නිසා අක්මාගත රෝග, වකුගඩු රෝග, පෙනහළු රෝග, සමේ රෝග… වගේ රෝග හටගැනීමේ හැකියාවක් තියෙනවා. හා හා.. බයවෙන්නෙපා පළතුරු ගෙඩියක් දෙකක් කෑවට මෙහෙම වෙන්නේ නෑ, ඒකට කාලයක් යනවා!!!

දැන් බලමු පළතුරු/එළවළු වලට කාබයිඩ් දැම්මාම මොනාද වෙන්නේ කියලා. මතකයිනේ මම කිව්වා කාබයිඩ් වලට ජලය එකතු කලා ම ඇසිටලීන් වායුව නිකුත් වෙනවා කියලා! ඔය ඇසිටලීන් වායුවෙන් වෙන්නේ අදාළ පළතුරු/එළවළු වල ලෙල්ල වර්ණවත් වෙන එක තමයි. ගෙඩියේ ඉදීමට/පැසීමට මේකෙන් බලපෑමක් නැහැ. කහ පාට වෙලා නිසා ඉදිලා ඇති කියලා හිතලා අපිත් ගන්නවා, ඒත් ගෙදර ගිහින් බැලුවම ඉදිලා නෑ! ඉදීමට/පැසීමට බලපාන්නේ එතිලීන් කියන වායුව. ඒ මඟින් ස්වාභාවික ව සිද්ධ වෙන, පළතුරේ ඇති අම්ලය හා පිෂ්ඨය, සුක්‍රෝස්(සීනී) බවට පරිවර්තනය වීමේ ක්‍රියාවලිය උත්තේජනය කරන එකයි කෙරෙන්නේ. මතකද අපේ පැරැන්නෝ කෙසෙල් ඉදවන්න වලකට කොළ ජාති එක්ක කෙසෙල් කැන දාලා දුම් ගහනවා. ඒකෙදි වෙන්නේ මේ බූව සහිත කොල වර්ග රත් වෙද්දි එතිලීන් වායුව නිකුත් වීමයි, එතකොට මම අර ඉහලින් කිව්ව ක්‍රියාවලිය උත්තේජනය වෙලා කෙසෙල් ඉක්මනට ඉදෙනවා.


හරි විදියට බැලුවොත් නම් 1993 අංක 788/7 දරන අහාර පනත අනූව කාබයිඩ් වලින් පලතුරු ඉදවන එක නම් සපුරා තහනම්. ඒ වුනාට අපේ අයියලා ඕවා බලන්නේ නෑනේ, පැහිලා නැති පළතුරු වුනත් විකුණාගන්න තත්වෙට පත් කරගන්න ලේසි ක්‍රමේ නේ. දැන් කියන්නම්කෝ කොහොමද මේ කාබයිඩ් සහිත පලතුරු හඳුනාගන්නේ කියලා. ලේසිම නති වුනත් ටිකක් විමසිල්ලෙන් බැලුවොත් අමාරුත් නෑ. සාමාන්‍යයෙන් පලතුරු ඉදෙන ක්‍රමයක් තියෙනවානේ. ඒ කියන්නේ නැට්ට ළඟ ඉඳන් පහලටනේ. මතක් කරගන්නකෝ කෙසෙල් කැනක්, අඹ ගෙඩියක් එහෙම... ඔය කියන පළතුරු ගෙඩිය/කැන පුරා ම ඒකාකාරී ව ඉදිලා තියෙනවා නම්, එහෙමත් නැත්තම් තැනින් තැන ඉදිලා තියෙනවා නම් ඔන්න කාබයිඩ් ගෙඩියක්!!!!

එහෙම කියලා පලතුරු නොකා එහෙම ඉන්න එපා හොඳද... මම කියන්නේ කාබයිඩ් ගෙඩි කන්න එපා කියලයි, ඒ නිසා පරෙස්සම් වෙන්න, සල්ලි දීලා ලෙඩ ගන්න එපා! ඒ නිසා අද ඉඳලා පළතුරු/එළවළු ගන්නකොට සැලකිලිමත් වෙන්න අමතක කරන්නෙපා!

8 දෙනෙකුට හිතුණ දේවල්:

Post a Comment

කමෙන්ටුවකින් දෙන්න පොඩි තල්ලුවක්. පෝස්ටුව ගැන හිතට හිතෙන දැනෙන ඕනෙ ම දෙයක් ලියන්න මෙතැන තමයි තැන ඔන්න.... හිතේ සතුට තමයි වටින්නේ !

හොඳම යාළුවෝ (ගැහැණු/පිරිමී…) වෙන්න පුළුවන් කාටද????



යාළුවෝ...මාළුවෝ අපි හැමෝටම ඉන්නවනේ. ඒ වුනත් විශ්වාසවන්ත යාළුවෝ ඉන්නේ කීදෙනාද නේද? එහෙම යාළුවෝ නම් ඉන්නේ බොහොම ටික දෙනයි. තව සමහරු පණ දෙන්න වගේ ඉන්නවා, මොනාහරි සිද්ධියක් වුණා ම තමයි එයාලගේ යාළුකම තේරෙන්නේ. හරියට කොකාගේ සුද පේන්නේ ඉගිලෙනකොට වගේ! ඇයි තව සමහරු ඉන්නවා අපේ හැමදේම අහගෙන ඉඳලා රට වටේ පතුරවන අය...අපි හැමෝටම ඔය වගේ අය අඩු වැඩි වශ්යෙන් ඉන්නවා. අද කතාව කියන්න යන්නෙත් මේ අපූරු යාළුකම ගැන. අපිට ඉන්න යාළුවන්ගෙන් හොඳම යාළුවෝ වෙන්නෙ පිරිමි අයද ගැහැණු අයද?? ලොකු ප්‍රශ්නයක් නේද? එහෙනම් කියවලා බලන්නකෝ මේ කතාව...

ඔන්න දවසක් බිරිඳට රාත්‍රියේ ගෙදර එන්න බැරිවෙලා. පහුවෙනිදා බිරිඳ ගෙදර ආවා ම සැමියා අහලා ඊයේ රෑ කොහෙද හිටියේ කියලා. ඇය කියලා ඊයේ රෑ හිටියේ ඇගේ මිතුරියකගේ ගෙදරක කියලා. ඉතින් සැමියා ඇගේ හොඳම මිතුරියන් කියලා දන්න දහදෙනෙකුට කෝල් කරලා අහලා ඒ ගැන. ඒ හැමෝම කියලා තියෙන්නේ ඇය ඔවුන්ගේ ගෙදර හිටියේ නෑ කියලා.

එතනින් ඒ කතාව ඉවරයි. ඔන්න තවත් දවසක සැමියාට රෑ ගෙදර එන්න බැරිවෙලා. පහුවෙනිදා ඔහු ගෙදර ආවා ම සුපුරුදු පරිදි බිරිඳ අහලා ඊයේ රෑ කොහෙද හිටියේ කියලා. සැමියත් කියලා එයාගේ හොඳම යාළුවෙක්ගේ ගෙදර හිටියේ කියලා. ඉතින් බිරිඳත් මේක අහලා සැමියාගේ හොඳම යාළුවෝ කියලා දන්න දහ දෙනෙකුට කෝල් කරලා අහලා මේ ගැන. ඒ දහදෙනාගෙන් පස්දෙනෙක් ම කියලා තියෙන්නේ ඇගේ සැමියා ඊයේ රෑ හිටියේ ඔවුන් එක්කමයි කියලා. අනිත් අය පස්දෙනා කියලා ඇගේ සැමියා ඊයේ රෑ ඉඳන් තාමත් ඉන්නේ එයාලා එක්කමයි කියලා...........

මේ මට ඊමේල් එකකින් ආව කතාවක්. අපූරුයි නේද එක එක්කෙනාගේ යාළුකම් වල තරම! ඔයාලාට නම් මේ ගැන හොඳ හොඳ අදහස් ඇති මේ ගැන, ඉතින් ඒවා පහළින් සටහන් කරලා යන්න අමතක කරන්නෙපා.....

16 දෙනෙකුට හිතුණ දේවල්:

Post a Comment

කමෙන්ටුවකින් දෙන්න පොඩි තල්ලුවක්. පෝස්ටුව ගැන හිතට හිතෙන දැනෙන ඕනෙ ම දෙයක් ලියන්න මෙතැන තමයි තැන ඔන්න.... හිතේ සතුට තමයි වටින්නේ !

කැළණිතිස්ස රජතුමා සහ උණුතෙල් කටාරම...



අද පෝය දවස නිසා මට හිතුණා ටිකක් වෙනස් දෙයක් ගැන කතා කරන්නෝන කියලා. මේ බණ කතාවක්මත් නෙවෙයි, ඒත් ඉගෙන ගන්න දේවල් තියෙනවා කියලා හිතුණ නිසා කියන්න හිතුණා. හැමෝම දන්නවනේ ලංකාවේ බිහිවුණු ශ්‍රේෂ්ඨ නරපතියෙක් වුණ දුටුගැමුණු රජතුමා. එතුමාගේ පියා තමයි කාවන්තිස්ස රජතුමා. මෑණියන් තමයි වීර කාන්තාවක් වෙන විහාර මහා දේවිය. ඇගේ පියා තමයි කැළණිතිස්ස රජතුමා. ඔය කැළණිතිස්ස රාජ පරම්පරාවට අයිති කතාවක් තමයි මේ කියන්න යන්නේ.

කැළණිතිස්ස රජතුමා, රහතන් වහන්සේ නමක් ව උණුතෙල් කටාරමක දාපු කතාව හැමෝම දන්නවනේ, ඒත් උන්වහන්සේ ට එහෙන විපාකයක් විඳින්න වුනේ ඇයි කියන එක ගැන නම් ගොඩක් අය දන්නේ නැතුව ඇති නේද? ඒ ගැන කියන්නයි මේ ලෑස්තිය. ම්ම්ම්...ඒත් ඊට කලින් මම අර කතාවත් කියලා ඉන්නම්කෝ. කැළණිතිස්ස රජතුමාට හිටියා සහෝදරයෙක් උත්තිය කියලා. මේ කුමාරයා අග බිසවත් එක්ක, ඒ කියන්නේ කැළණිතිස්ස රජතුමාගේ මෙහෙසියත් එක්ක අයථා සම්බන්ධයක් ඇති කරගෙන තිබුණා. කාලයක් රහසක් වෙලා තිබුණ මේ ආරංචිය කැළණිතිස්ස රජතුමාගේ කණට වටෙන්න වැඩි කාලයක් ගියේ නැහැ. මේකේ ප්‍රතිඵලය වුනේ උත්තිය කුමාරයා සිරභාරයට ගන්න කියලා රාජ නියෝගයක් නිකුත් වුන එක. ඒ බව ආරංචි වුන උත්තිය කුමාරයා හොරෙන් ම පැනලා ගිහින් හැංගුණා. කොහොම උනත් මේ තනිකම උත්තිය කුමාරයාට ඉවසන්න අමාරු උණා. ඒ නිසා ම කුමාරයා තීරණය කලා තමන්ගේ ප්‍රේමවන්තියට තමන්ගේ දුක කියලා හසුනක් යවන්න. මේ දූත කාර්යය බාර වුන තරුණයා කලේ රජ මැදුරේ දානයක් තියෙන දවසක් බලලා මහන වෙස් අරන් රජ මාළිගයට ගිය එක. භික්ෂූන් වහන්සේලා එක්කම දානේ එහෙම වළඳලා රහතන් වහන්සේ නමක් පසුපසින් එළියට ගමන් කරනවා. රාජ මෙහෙසිය බලාගෙන හිටිය වෙලාවක් බලලා අර උත්තිය කුමාරයාගේ හසුන ලිව්ව තල්පත බිමට දැම්මා දේවියට පෙනෙන්න. දේවිය මේ තල්පත අතට ගන්නවා රජතුමා දැක්කා. රජතුමා මේ තල්පත පරීක්ෂා කරලා බලද්දි අර රහතන් වහන්සේ ගේ අත් අකුරුත් මේ අත් අකුරුත් එක හා සමානයි ලු. ඒ නිසා මේ රහතන් වහන්සේ හා රජ මෙහෙසිය අතර සම්බන්ධයක් තියෙනවා කියලා නිගමනය කළ කැළණිතිස්ස රජතුමා, අර රහතන් වහන්සේ ව උණු තෙල් කටාරමක බහා මරණයට පත් කරන්න නියෝග කලා.

මේ කතාව මහාවංශය, රාජාවලිය, රසවාහිනිය වගේ සාහිත්‍ය මුලාශ්‍ර වල ජනප්‍රිය කතාවක්. දැන් කියන්නම්කෝ අර රහතන් වහන්සේ ට උණු තෙල් කටාරමක පිරිනිවන් පාන්න වුනේ ඇයි කියලා. උන්වහන්සේ පෙර ආත්මයක ගොපල්ලෙක් වෙලා ඉපදිලා ඉද්දි මැස්සෙක් එක්ක කිරි මුට්ටියක් උණු කිරීමේ විපාක විදියට තමයි එහෙම වෙලා තියෙන්නේ. ඒ බව පුබ්බේ නිවාසානුස්සති ඤාණය උපදවා ගෙන හිටිය රහතන් වහන්සේට පුළුවන් වුනා කියලා තමයි සඳහන් වෙන්නේ. ඒ වගේම උන් වහන්සේ පැහෙන තෙල් කටාරමේ වැඩ ඉද්දි ම ගාථා සීයක් දේශනා කරලා කරලා තියෙනවා ථේර කටාහ ගාථා නමින් මිනිස්සුන්ට අවවාද විදියට.....

අපි නොසැලකිල්ලෙන් කරන පුංචි පුංචි වැරදි ගොඩක් එකතු වුනා ම ලොකු වැරද්දක් බවට පත් වෙනවා කියලා දැනෙන්නෑ අපි කාටවත් ම....එහෙම නේද? ඔයාලට හිතෙන්නේ මොනාද කියලත් කියලා ම යන්නකෝ කැමති නම් පහළින්!!!

8 දෙනෙකුට හිතුණ දේවල්:

Post a Comment

කමෙන්ටුවකින් දෙන්න පොඩි තල්ලුවක්. පෝස්ටුව ගැන හිතට හිතෙන දැනෙන ඕනෙ ම දෙයක් ලියන්න මෙතැන තමයි තැන ඔන්න.... හිතේ සතුට තමයි වටින්නේ !

දැන් කාලේ ඉන්න බුද්ධිමත් පොඩ්ඩෝ...!




මේ කතාව මම පත්තරේක දැක්ක එකක්. ඒත් ටිකක් විතර වෙනස් අත්දැකීමක් වේවී දෝ කියලා හිතුන නිසා ලියන්න හිතුවා. අපි පොඩි කාලේ හැසිරීමයි, දැන් කාලේ ඉන්න පොඩි වුන්ගේ හැසිරීමයි බලද්දි ලොකු වෙනසක් දැනෙනවා නේද... සමහරුන්ට හිතෙයි දැන් කාලේ ඉන්න එවුන් නම් ගන්න දෙයක් නෑ කියලා, ඒත් සමහරුන්ට නම් ඒක ගානක් නෑ. මට නම් හිතෙන විදියට ඒක තමයි පරම්පරා ඝට්ටනය කියලා කියන්නේ. මොකද අපි පොඩිකාලේ ඉද්දී අපේ වැඩිහිටියොත් එයාලගේ ළමාවිය අපෙත් එක්ක සංසන්දනය කරලා එහෙම ම කියන්න ඇති. ඒ නිසා ම අපිත් එහෙම කියනවා ඇති කියලයි මට නම් හිතෙන්නේ. කොහොම උනත් මට හිතෙන තව දෙයක් තමයි අපිත් එක්ක බලද්දි දැන් ඉන්න පුංචි ළමයි වයසටත් වඩා බුද්ධිමත් කියලා. ඔයාලා මොනවද හිතන්නේ ඒ ගැන? ම්ම්ම්.... වැල්වටාරම් ඇති වගේ නේද.. කතාව කියවලා ම ඉමුකෝ එහෙනම්!

මේ ඇමෙරිකන් කතාවක්. ඔන්න එක අම්මා කෙනෙක් තමන්ගේ පුංචි පුතණ්ඩියාවත් වාහනේට දාගෙන තමන්ගේ යාළුවෙක්ගේ ගෙදර යන්න පිටත්වුනා. පුත්‍රයා මග දිගට තොරතෝංචියක් නැතුව කතාව. කියවනවා කියවනවා ඉවරයක් නැතුව ම. දන්නවනේ පොඩි අය කියවන්න ගියා ම කටට බ්‍රේක් නෑනේ. ඔන්න පුතා අම්මාගෙන් මේ විදියේ ප්‍රශ්නයක් අහනවා. "අම්මේ අම්මේ... අම්මගේ වයස කීයද ?" පුතා... ඔයා දැනගන්නෝන ගෑණු අයගෙන් වයස අහන එක හොඳ පුරුද්දක් නෙවෙයි, ඔන්න අම්මා පොඩි එකාට ඒ ගැන දේශනාවක් දෙනවා. ඒක ඉවර උන ගමන් ම තව ප්‍රශ්නයක්. "අම්මේ අම්මේ... අම්මගේ බර කීයද? " පුතා... ඔයාට මොකටද ඕවා..?? අම්මා ටිකක් විතර දෝස්මුරයක් දැම්මා.. පොඩ්ඩා ටික වෙලාවක් යනකල් සද්ද නෑ.. පොඩි එකාට ප්‍රශ්න නම් හිතේ තෙරපෙනවා. ඒත් අහන්න විදියක් නෑනේ. ඔන්න ටික වෙලාවකින් ආයෙත් ප්‍රශ්නයක්. "අම්මේ අම්මේ... අම්මා තාත්තාගෙන් ඩිවෝස් වුනේ ඇයි?? " ඒ සැරේ නම් අම්මාට ලෙල්ලටම තද වුනා. "පුතා.. ඔයාට ඕන දේත් තියෙනවා, එපා දේත් තියෙනවා හොඳද, වයසේ හැටියට හැදෙන්න..." අම්මා ඒ ටික කිව්ව ස්වරෙට පොඩි එකාට ප්‍රශ්න අහන්න තියා කතා කරන්නවත් බය හිතුනා. ඒත් අහන්න ප්‍රශ්න නම් කෝටියයි.

ඔන්න ඔයින් මෙයින් අම්මා යාළුවාගේ ගෙදරටත් ආවා ඔන්න. එහෙත් හිටියා ඒ වයසෙම පොඩ්ඩෙක්. මුලින් මුලින් ඇඹරි ඇඹරි ඉඳලා කොල්ලෝ දෙන්නා සෙට් වුනා සෙල්ලමට, දැන් ගජ යාළුවෝ. ඒ අතරේ එක්කෙනෙක් වාහනේ එද්දි වුන සිද්ධිය අකුරක් නෑර යාළුවට කිව්වා. අනිත් පොඩි එකා කිව්වලු "අයියෝ මම නම් ඕවා දැනගෙන ගොඩාක් කල්, ඒක හරි සිම්පල්නේ" අනිත් එක්කෙනාට හිතුනලු මූ නම් මාර වැඩ්ඩෙක්නේ කියලා. "අම්මගේ ඩ්‍රයිවින් ලයිසන් එකේ ඔය සේරම විස්තර තියෙනවනේ " ඔන්න වැඩේ කරන හැටි කියලත් දුන්නා යාළුවට. ඉතින් මේ පොඩ්ඩත් අම්මා ටිකක් එහෙට මෙහෙට වෙනකල් ඉඳලා ඩ්‍රයිවින් ලයිසන් එක අරන් ඔක්කොම විස්තර බලාගත්තා. ඔන්න දැන් දෙන්නා ආපහු යනගමන්. දැන් ඉතින් අම්මාගේ මූඩ් එක හොඳයිනේ. පොඩ්ඩගේ කටට ආයෙත් පණ ආවා. මෙන්න ඇතිවුන දෙබස...



පුතා: මම අම්මාගේ වයස දන්නවා.. !(කොල්ලත් වැඩ්ඩා වගේ කියනවා!)
අම්මා : හා.. කියන්න බලන්න එහෙනම්.
පුතා : 33 යි. හරිද? මම අම්මගේ බරත් දන්නවා!
අම්මා : හා.. කියන්න බලන්න.
පුතා : කිලෝ 65යි නේ! තාත්තා අම්මාගෙන් ඩිවෝස් වුනේ ඇයි කියලත් මම දන්නවා!
අම්මා : ඒ මොකද?
පුතා : අම්මා sex ෆේල්. අම්මාට sex වලට තියෙන්නේ F එකක්!!!!

දැන් කාලේ ඉන්න එවුන් හැදිලා තියෙන හැටි නේද! අපි වුනත් පොඩි අය එක්ක වැඩ කරනකොට කොයිතරම් නම් හිතන්නෝනද නේද!!! (උඩ ෆොටෝ එක හෙමීට බැලුවොත් ඔයාලටත් පෙනේවි sex වලට F කියලා! ). යනගමන් මොනාහරි කියාගෙන ම යන්න!

12 දෙනෙකුට හිතුණ දේවල්:

Post a Comment

කමෙන්ටුවකින් දෙන්න පොඩි තල්ලුවක්. පෝස්ටුව ගැන හිතට හිතෙන දැනෙන ඕනෙ ම දෙයක් ලියන්න මෙතැන තමයි තැන ඔන්න.... හිතේ සතුට තමයි වටින්නේ !

Radar (රේඩාර් ) නැති කාලේ ප්ලේන් ආව හැටි....




මට ඊ මේල් එකකින් ආව ඡායාරූප ටිකක් ඔයාලත් එක්ක බෙදාගන්න හිතුණා. ඒකේ තියෙන්නේ රේඩාර් තාක්ෂණය හොයාගන්න කලින් කොහොමද ගුවන්යානා හඳුනාගත්තේ කියලා. බලන්නකෝ කොහොමද කියලා, හිනායනවා නේද? හැබැයි ඉතින් මේ විදියටවත් බලන්නේ නැතුව සතුරු යානයක් ඇවිත් බෝම්බ දාලා ගියොත් එපා කියන්නයැ...
ඒ නිසා මේක ඒකාලේ හැටියට ලොකු තාක්ෂණයක්. ඊට කලින් කියලා ඉන්නම්කෝ මේ රේඩාර් කියන්නේ මොකක්ද කියලා. රේඩාර් කියන්නේ චලනය වන හෝ නිශ්චල ව තියෙන වස්තූන් දුර ඉඳන් හඳුනාගන්නා ක්‍රමයක්! උදාහරණයක් කිව්වොත් ගුවන් යානා,නැව්, මෝටර් රථ, මිසයිල වගේ දේවල්. මේ සඳහා යොදාගන්නේ විද්‍යුත් චුම්බක කිරණ, විශේෂයෙන් ම රේඩියෝ තරංග. ඇන්ටෙනාවක් හරි ඩිෂ් එකකින් හරි නිකුත් කරන රේඩියෝ තරංග අදාළ වස්තුවේ ගැටිලා පරාවර්තනය වන කිරණය නැවත ග්‍රහණය කරලා ඒ පිළිබඳ ව යම් යම් ගණනය කිරීම් කරලා අදාළ වස්තුවේ පරාසය, වේගය, දිශාව, උස වගේ දේවල් පහසුවෙන් ම නිර්ණය කරන්න පුළුවන්. A/L වලට Science කළ අයට නම් Physics වල ඩොප්ලර් ආචරණය මතක් වෙනවා ඇති නේද? දෙවෙනි ලෝක යුද්ධ කාලේ ඇමෙරිකානු හමුදාව තමයි මේ තාක්ෂණය ගොඩක් දියුණු කරලා ගත්තේ සතුරන්ගේ ඔත්තු බලන්න. දැන් නම් මේ තාක්ෂණය ගොඩාක් වෙලාවට පාවිච්චි කරනවා අමතර ව traffic පාලනය කරන්න, ප්‍රති මිසයිල පද්ධති වලට, ගුවන් ආරක්ෂක පද්ධති වලට වගේ දේවලටත්. මම හිතන්නේ දැන් ඇති වගේ නේද කියෙව්වා මේ ගැන, තවත් කිව්වොත් නම් එපා වෙයි. එහෙනම් ෆොටෝස් බලන්නකෝ....















කොහොමද වැඩේ... මරු නේද? එහෙනම් මේ ගැන මොනාහරි කියලා යන්නත් අමතක කරන්න එපා හොඳද!

9 දෙනෙකුට හිතුණ දේවල්:

Post a Comment

කමෙන්ටුවකින් දෙන්න පොඩි තල්ලුවක්. පෝස්ටුව ගැන හිතට හිතෙන දැනෙන ඕනෙ ම දෙයක් ලියන්න මෙතැන තමයි තැන ඔන්න.... හිතේ සතුට තමයි වටින්නේ !

Notepad එකෙන් RAM එක Clean කරන්න.....



අපේ පරිගණකයේ වේගයට බලපාන ප්‍රධාන උපාංගයක් තමයි RAM එක කියලා කියන්නේ. RAM එක කියන්නේ තාවකාලික මතකයක්, ඒක විදුලිය මත රඳා පවතිනවා කියලා අමුතුවෙන් කියන්න ඕන නෑනේ. අපි ගොඩාක් වෙලාවක් පරිගණකයත් එක්ක වැඩ කරද්දී, ඒ කියන්නේ අපි එක දිගට පරිගණකය පාවිච්චි කරන තරමට RAM එක මත තැන්පත් වෙන දත්ත ප්‍රමාණය වැඩිවෙනවා. ඒ හා සමානුපාතික ව පරිගණකයේ වේගයත් ටික ටික අඩුවෙනවා. ඒක සමහර වෙලාවට දැනෙන තරමකට වෙන්නත් පුළුවන්, නොවෙන්නත් පුළුවන්. ඒක රඳා පවතින්නේ තමන් පරිගණකයේ කරන්නේ මොන විදියේ වැඩද කියන එක මතයි. ඒ නිසාම මම හිතුවා ලේසියෙන් ම RAM එක clean කරගන්න විදියක් කියලා දෙන්න. හැබැයි මේ දේ කරන්න software එහෙමත් තියෙනවා හොඳද! (උදා: Ram Cleaner 6.7). ඒත් ඊට වඩා ලේසියෙන් අපිට මේ විදියට RAM එක clean කරගන්න පුළුවන්.

1. ගන්න Notepad එකක්.

2. Type කරන්න මේ විදියට(quotes නැතුව ). "FreeMem=Space(10240000000)"

3. Save කරන්න “CLEANER.VBS" කියලා (quotes නැතුව )ඔයා කැමති තැනක.

4. ඔයාගේ RAM එක 512MB නම් 1024 වෙනුවට 512 replace කරන්න. 2GB නම් 2048 replace කරන්න.

5. දැන් Save කළ තැනට ගිහින් file එක Run කරන්න.

වැඩේ හරිගියාද කියලා Comment කරලා යන්නත් අමතක කරන්නෙපා හොඳද!

9 දෙනෙකුට හිතුණ දේවල්:

Post a Comment

කමෙන්ටුවකින් දෙන්න පොඩි තල්ලුවක්. පෝස්ටුව ගැන හිතට හිතෙන දැනෙන ඕනෙ ම දෙයක් ලියන්න මෙතැන තමයි තැන ඔන්න.... හිතේ සතුට තමයි වටින්නේ !

අපේ රැග් සීසන් එක...



මම මේ කියන්න යන්නේ රැග් සීසන් එක ගැන කතාවක්. මේක මට මතක් වෙන්න හේතුව තමයි අපේ කැම්පස් එකට අළුතින් බැජ් එකක් මේ ළඟදි ගත්ත එක. කැම්පස් එකක රැග් සීසන් එක කියන්නේ මාර ම ජොලි කාලයක්නේ. ජූනියර්ස් ලාට කෙසේ වෙතත් සීනියර්ස්ලට. රැග් සීසන් එක විඳින කාලේ ඒක කොයිතරම් කට්ටක් උනත් පස්සෙ කාලෙක මතක් කර කර මැරෙනකල් හිනාවෙන්නේ ඒ දවස්වල එක එකාට වුන දේවල් කියකිය. හැමෝටම කියන්න දේවල් මොනාහරී තියෙනවනේ. ඒ නිසා ම රැග් සීසන් එක ගැන රස කථා ගොඩයි. ඒත් දැන් දැන් රැග් එක කියන එක අතීතයට එකතු වෙන දෙයක් වේගන එනවා වගේ පේනවානේ, හැබැයි ඒ ගැන නම් එක එක්කෙනාට විවිධ ආකාරයේ මත තියෙන්න පුළුවන්. මොකද ඔය සුන්දර මතකයක් වෙන්නෝන රැග් එක එක එක්කෙනාගේ පටු අරමුණු වෙනුවෙනුත් සමහර වෙලාවට යොදාගන්න නිසා.

මේක අපේ බැජ් එකේ කෙල්ලෙකුට වුන දෙයක්. ඒ දවස්වල කෙල්ලෝ කොල්ලෝ කියලා භේදයක් නෑ, සීනියර්ස්ලා ට පණ බයයිනේ. අපිට තිබුණ මොනාහරි ප්‍රෝග්‍රෑම් එකක් අතරතුර දුන්න ඉන්ටර්වල් එකකදි කෙල්ලෙක් එලියට ගිහින් එන අතරතුරදි සීනියර් අයියා කෙනෙක් හම්බ වෙලා, මෙහෙමයි දෙබස...

සීනීයර්: තෝ කොහෙද ගියේ?

ගැහැණු ළමයා: ටොයිලට් එකට ගියා ජ්‍යෙෂ්ඨ උත්තමයා...

සීනියර් : ඈ... තොගේ කඩ්ඩ නේද? මෙච්චර දවසක් තොපිට ඕකද කියලා දුන්නේ?

ගැහැණු ළමයා: සොරි ජ්‍යෙෂ්ඨ උත්තමයා!!!!!!!!!!!

5 දෙනෙකුට හිතුණ දේවල්:

Post a Comment

කමෙන්ටුවකින් දෙන්න පොඩි තල්ලුවක්. පෝස්ටුව ගැන හිතට හිතෙන දැනෙන ඕනෙ ම දෙයක් ලියන්න මෙතැන තමයි තැන ඔන්න.... හිතේ සතුට තමයි වටින්නේ !

අද මම එද්දි දැක්කනේ මාර ලස්සන කෙල්ලෙක්....



අද මම එද්දි දැක්කනේ මාර ලස්සන කෙල්ලෙක්.... හරියට නිකම් xxxx වගේ, ආයේ කියලා වැඩක් නෑ. මම දැක්කමයි ඒතරම් ලස්සන කෙල්ලෙක්!!!! අපි ඕනතරම් එහෙම කියලා ඇති නේද? ඒ වගේ ම ඕන තරම් ඇහිලත් ඇති. අපි පාරේ තොටේ එහෙ මෙහේ යද්දී අපි දකිනවානේ කොහොමත් එක සැරයක් දැක්කම ආයේ සැරයක් හැරිලා බලන්න තරම් හිතෙන ලස්සන ගැහැණු ළමයි. සමහරු සුදුයි, තළෙළුයි, උසේ හැටියට මහත, පිරිපුන් අඟපසඟ... තවත් අය කළුයි ඒත් හරි ප්‍රියමනාප ගතියක් තියෙනවා. ඒ කිව්වේ ගැහැණු ළමයින් ගේ රූමත් කම ගැන. පිරිමි අයත් ඉන්නවනේ අපි අතර කැපී පෙනෙන ලස්සනක් තියෙන අය. හරියට නිකම් අර අහවල් නළුවා වගේ කියලා කියන. ඒ වගේ ම තමයි ගැහැණු පිරිමි භේදයක් නැතුව ම එතරම් දැක්කම ප්‍රියමනාප ගතියක් නැති අයත් අපි අතරේ ඉන්නවානේ.....

කොහොමද මේ ලෝකේ ඉන්න සමහර අය ලස්සන වෙලා තවත් සමහරු කැත වෙන්නේ???? ප්‍රශ්නයක් නේද? ඒකට හේතුව තමයි මේ පැහැදිලි කරන්න හදන්නේ. මේ ලෝකේ ජීවත් වෙන සමහර මිනිස්සු ඉන්නවා නිතරම ඉන්නේ තරහින්, ඒ වගේ ම පොඩි දේටත් තරහ ගන්න බලාගෙන ඉන්නේ. අපි කියන්නේ හොස්ස ලඟින් මැස්සා යන්න බෑ කියලා! හැම වෙලේ ම හිතේ තද ගතියෙන් ඉන්න ඒ අය ඒ නිසා ම හැමවෙලේම ජීවත් වෙන්නේ සිත්තැවුලෙන්. ඒ නිසා එයාලා රැස්කර ගන්න කර්ම විපාකයෙන් මරණින් පස්සේ ගොඩාක් දුක් සහිත අපායේ ඉපදෙනවා. බැරිවෙලාවත් මිනිස් ලෝකේ ඉපදුනොත් දුර්වර්ණ වුන කැත රූපයක් එක්ක ඉපදෙනවා.

ඒ වගේ ම තවත් සමහර මිනිස්සු ඉන්නවා පොඩි දේකටවත් තරහා ගන්නෙ නෑ, එහෙනම් ලොකු දේවල් ගැන මොන කතාද? අඩුම තරමේ අසතුටු බවක්වත්, තරහා ගත්ත බවක් වත් පෙන්නන්නේ නෑ. අනිත් අය කරන වැරදි වලට සමාව දෙන ගමන් ම හැමෝටම මෙත් සිතින්මයි ජීවත් වෙන්නේ. ඉතින් ඒ අය කරන කර්මය නිසා ම මැරුණාට පස්සේ සැප ඇති දිව්‍යලෝකයේ ඉපදෙනවා, හෙමත් නැත්තම් මිනිස් ලෝකෙ ඉපදුනොත් ඉතාම ලස්සන සිත් ඇදගන්නා සුළු රූපයක් සහිත කෙනෙක් වෙනවා.

සමහරු කැත විදියටත් සමහරු ලස්සන විදියටත් ඉපදෙන මේ ගැටළුව ඇති වුණේ සුභ මානවකයාට. බුදුරජාණන් වහන්සේ චූල කම්ම්විභංග සූත්‍රය දේශනා කරලා ඔය විදියට ඒ ගැටළුව නිරාකරණය කරනවා. ඒ වගේම මිනිස්සු අඩු වයසින් මැරෙන්නේ ඇයි?, නිතර ලෙඩ වෙන්නේ ඇයි?, දුප්පත් ඇයි?, සමහරු තනිවෙන්නේ ඇයි?, හැමෝම බුද්ධිමත් නැත්තේ ඇයි?...ආදි වශයෙන් ගොඩාක් ගැටළු වලට හේතු උන්වහන්සේ පහදලා දුන්නා. අපිට මේ ලැබුණු ගොඩාක් දේවල් මේ විදියට ලැබුණේ අපේ පෙර කර්ම නිසානේ. අපි මිනිස් ලෝකේ ඉපදෙන්නත් ගොඩාක් ලොකු පිනක් රැස්කරලා තියෙනවා. ඉතින් අපි හිතන්න ඕන අපි කොහොමද අපේ ඊළඟ ඉපදීම සාර්ථක කරගන්නේ කියලා නේද? මොකද අපි බෞද්ධයන් විදියට පුනර්භවය පිළිගන්න නිසා. ඒ නිසා තරහා යන නරක ගතිය අඩු කරගන්න හිතාගත්තොත් කොහොමද.....පෝය දවස නිසා තමයි මෙහෙම දෙයක් ලියන්න හිතුනේ. ඔයාලා මොනවද මේ ගැන හිතන්නේ කියලත් කියලා ම යන්න අමතක කරන්න එපා!

7 දෙනෙකුට හිතුණ දේවල්:

Post a Comment

කමෙන්ටුවකින් දෙන්න පොඩි තල්ලුවක්. පෝස්ටුව ගැන හිතට හිතෙන දැනෙන ඕනෙ ම දෙයක් ලියන්න මෙතැන තමයි තැන ඔන්න.... හිතේ සතුට තමයි වටින්නේ !

හදවත ලෙඩ වෙන්නේ මෙහෙමයි.....



හික්ස්... හදවත් රෝග වර්ග නම් ගොඩක් තියෙනවානේ එක එක අයට එක එක කාලෙට හැදෙන. සමහර ඒව නම් දවසින් දෙකෙන් හොඳ වෙනවා. සමහර ඒවා නම් සති, මාස ගණන් ගත වෙන ඒවත් තියෙනවා. ලේසියකට හොඳ කරන්න බැරි ඒවත් තියෙනවා. මම හිතන්නේ ඊටත් වඩා සමහර හදවත් තියෙනවානේ හැමදාම ලෙඩ වෙන ඒවා. ඒවා තමයි නඩත්තුව අමාරු ම !! හැමදාම බෙහෙත්දෙන්න ඕනනේ. ඒත් මම නම් අද කියන්න යන්නේ සිරුරේ තියෙන වැදගත් ම ඉන්ද්‍රියක් වෙන හෘදය ලෙඩ වෙන්නේ කොහොමද කියලයි. බලන්නකෝ කියවලා ඔයාලාටත් වැදගත් ද කියලා.

හෘදය ආශ්‍රිත ව ඇතිවෙන ප්‍රධානතම ලෙඩක් තමයි හෘදයාබාධ කියලා කියන්නේ. ඊට ප්‍රධාන හේතුව තමයි සරලව ම ගත්තොත් හෘදයෙ හි ක්‍රියාකාරිත්වයේ යම් වෙනසක් ඇති වීමයි. ඒ දේ වෙන්නේ මෙහෙමයි. සාමාන්‍යයෙන් අපේ ඇඟේ තියෙන අනිකුත් මාංශ පේශි ටික වෙලාවක් එකදිගට වැඩ කලා ම මහන්සියට පත් වෙනවානේ. ඒත් හදවත් එහෙම නෑ. ජීවිත කාලය පුරාවට ම මහන්සියකින් තොරව එක දිගට වැඩ කරනවා. ඒ නිසා ම හෘත් පේශි වලට සාපේක්ෂ ව තරමක් වැඩි රුධිර සැපයුමක් ඕන කරනවා. ඒ හෘත් පේශි වලට අවශ්‍ය රුධිරය ලබාදෙන්නේ කිරීටක ධමනි කියලා විශේෂිත රුධිර නාළ වර්ගයක් මඟින්. ප්‍රධාන කිරීටක ධමනි වර්ග දෙකක් තියෙනවා. ඒ ලෙවල් වලට ජීව විද්‍යාව කල අය නම් මේ ගැන හොඳට දන්නවා. මම නම් කලේ ගණන් හදපු එකනේ!!



මම අර කලින් කිව්ව කිරීටක ධමනි කුඩා වීමක් හරි පටු වීමක් හරි වුනොත් තමයි ඒ මඟින් නඩත්තු වෙන හෘත් පේශි කොටස යම් මන්දපෝෂණ තත්වයකට ලක්වෙන්නේ. මේ කිරීටක ධමනියක් දළ වශයෙන් කිව්වොත් කාබන් පෑන් කූරකට වඩා පොඩ්ඩක් ලොකුයි. මේ රුධිර නාල තුලින් කාලයක් තිස්සේ රුධිරය ගමන් කරද්දී යම් යම් හේතු නිසා ඒ තුළ ඉරිතැලීම් ඇතිවෙන්න පුළුවන්. වයසට ම යන්න ඕන නෑ, කෙනෙකුට තරුණ වයසේ දි වුනත් ඇතිවෙන්න පුළුවන් මේ තත්වය. කාලයක් යද්දි මේ ඉරිතැලීම් මත තෙල්(මේදය) තැම්පත් වීමක් වෙන්න පුළුවන්. කාලයත් එක්ක තෙල් ටික ටික එකතු වෙලා ගුලියක් බවට පත්වෙන්න හැකියාව තියෙනවා. ඒත් එක්කම මේ තෙල් ගුලිය වටකරමින් ආවරණයක් ඇතිවෙන්න පටන් ගන්නවා. එතකොට මේ ගැටය අතරින් රුධිරය ගමන් කිරීමේදී වේගය අඩුවීමක් සිද්දවෙනවා. (Physics වල තිබුණා වගේ මතකයි P1V1=P2V2 වගේ තියරියක් ). ඒ කියන්නේ වේගයට අනුව පීඩනය වෙනස් වීමක් ඇතිවෙනවා.

උදාහරණයක් කියන්නම්කෝ, හිතන්නකෝ අපි දුවනවා, ව්‍යායාම් කරනවා වගේ සිරුර මහන්සි වෙන දෙයක් කරනවා කියලා. එතකොට හෘදයට සාමාන්‍ය අවස්ථා වලට වඩා වැඩි ශක්තියක් අවශ්‍ය වෙනවා. ඒ ශක්තිය ලබාගන්න හෘද ස්ඵන්දනය වැඩිවෙනවා, ඒත් එක්කම ලේ ගමනාගමනය වැඩිවීමක් සිදුවෙනවා ඊට හරියන්න. අර කලින් සඳහන් කල ආකාරයේ තෙල් ගුලියක් සහිත රුධිර නාලයකට මේ කාර්යය කාර්යක්ෂම ව කරන්න බෑ, ඒ වෙලාවට තමයි පපුවේ මහන්සිය ඇතිවෙනවා කියන්නේ. හරියටම කිව්වොත් මේ ඇන්ජයිනා තත්වයක්. මේ තත්වය විවේක ගන්නකොට අඩුවෙන්නේ හදවත නැවත් සාමාන්‍ය මට්ටමට පත්වෙන නිසයි. සමහර අයට මේ වේදනාව පපුවෙන් පටන් අරන් බෙල්ලට, උගුරට, හනු වලට, අත්වලට, කොන්දට පැතිරෙන්න පුළුවන්. මේ තත්වය නම් බලාගෙන ඉන්න හොඳ දෙයක් නෙවෙයි. මේකෙන් තේරුන් ගන්නෝන දේ තමයි අපේ කිරීටක ධමනි වල මොනාහරි ගැටළුවක් කියන එක. වහා ම වෛද්‍ය ප්‍රතිකාර වලට යොමුවෙන එක තමයි නුවණට හුරු.


ඊළඟ අවස්ථාව තමයි තරමක් දරුණු. මොනාහරි හේතුවක් නිසා අර කලින් සඳහන් කල තෙල් ගුලිය සහිත ආවරණය පුපුරලා තෙල් තට්ටුව රුධිරයට නිරාවරණය වෙන්න පුළුවන්. අපේ ඇඟේ බාහිර තුවාලයක් ඇතිවුනාම ලේ ගැලීම නවත්වන්න ලේ කැටිගැසීමක් වෙනවා හැමෝම දන්නවානේ.(එහෙම නොවෙන එකත් එක්තරා රෝගයක් හිමෝෆීලියාව කියන! ). ඒ වගේම අර තෙල් ගැටය මතත් රුධිර කැටියක් ඇතිවෙනවා. ඒ කියන්නේ අර තෙල් ගුලිය වහලා දාන්න හැදෙන ලේ කැටිය මඟින් මෙතෙක් වෙලා බාගෙට වැහිලා තිබුණ කිරීටක ධමනිය තවදුරටත් අවහිර වෙනවා. බැරිවෙලාවත් මේ නාලය සම්පූර්ණයෙන්ම අවහිර වුනොත් ඇතිවෙන්නේ හෘදයාබාධයක්. ඒ කියන්නේ බොහෝවිට මරණීය තත්වයක්! මේ අවදානම තියෙන අයටත් කලින් අයට වගේ ම පපුවේ මහන්සිය ඇතිවෙන්න ඉඩ තියෙනවා ක්‍රියාකාරකමක් නොකර නිකම් ඉද්දිත්. ඒක තමයි මෙතනදි මතුවෙන බරපතල ම තත්වය. මොකද හැමවෙලාවෙම බෙහෙත් අතේ ම තියාගෙන ඉන්න එපැයි.

සාමාන්‍යයෙන් පිරිමියෙකුට අවුරුදු තිහ ඉක්මවනවත් එක්කම මේ අවදානම එනවා. ඊට හේතුව පරම්පරාවෙන් එන රෝගී තත්ව වගේ ම දියවැඩියාව, කොලෙස්ටරෝල්, අධික රුධිර පීඩනය හැරුණු විට දුම් පානයයි. කාන්තාවන් ටත් නම් අක්‍රිය දුම්පානයට නිරාවරණය වුනොත් මේ අවදානම තියෙනවා. දැන් දැන් විකෘති වෙමින් යන ආහාර රටාවත්, ඒ කියන්නේ ක්ෂණික ආහාර, ප්‍රමිතියෙන් තොර ආහාර වර්ග ත් මේ තත්වයට යම් තරමකින් හරි දායකත්වය සපයනවා. දන්නවද... අපි සාමාන්‍යයෙන් අවුරුද්දකට සීනී 50kg ට ආසන්න ප්‍රමාණයක් පරිභොජනයට ගන්නවා කියලා පරීක්ෂණයකින් හොයාගෙන තියෙනවා. කොහොමද වැඩේ!!!

මේ වේදනාව ගොඩාක් දරුණුයි කියලා මම පුද්ගලිකව ම දැකලත් තියෙනවා. ඒ නිසා ම හිතට මේ දේවල් තදින් ම හිතට වැදුනා. …ඒ දේවල් කොහොම වුනත් මේ දේවල් සම්පූර්ණයෙන් ම නවත්වන්න බැරිවුණත් උපරිම වශයෙන් පාලනය කරන්න පුළුවන් තරම් වෛද්‍ය විද්‍යාව දියුණුයි. ඒ නිසා හොඳම වැඩේ තමයි පුරුද්දක් විදියට නිශ්චිත කාලයකට සැරයක් වෛද්‍ය පරීක්ෂණයක් කරගන්න එක. ඒ වගේම නොමිලේ ම කරන්න පුළුවන් දුම් පානයෙන් වළකින එක. ඒ වගේ ම සරල අහාර රටාවකට පුරුදු වෙන එක. මේ දේවල් ක්‍රියාත්මක කරන්න හෘදයාබාදයක් හැදෙනකල් ම බලාගෙන ඉන්නෝන නෑ නේද!

ප. ලි: Google හඳුන්වලා දීලා තියෙන hidden trick එක දැක්කාද? Google ගිහින් Do a Barrel Roll කියලා type කරලා බලන්නකෝ....!

10 දෙනෙකුට හිතුණ දේවල්:

Post a Comment

කමෙන්ටුවකින් දෙන්න පොඩි තල්ලුවක්. පෝස්ටුව ගැන හිතට හිතෙන දැනෙන ඕනෙ ම දෙයක් ලියන්න මෙතැන තමයි තැන ඔන්න.... හිතේ සතුට තමයි වටින්නේ !

Windows 7 සිංහලකරණය කරමු....





Windows 7 ඇවිල්ලත් දැන් අවුරුදු දෙකකටත් වැඩියි වගේ. ලබන අවුරුද්දේ Windows 7 එන්නත් තියෙනවා. ම්ම්ම්... ඔයාලට හිතෙනවා ඇති ඒ අස්සේ මොනවද මේ කියන්න යන්නේ කියලා නේද? හැබැයි ඉතින් එක අතකට මේකේ කාලින වැදගත්කමකුත් තියෙනවද මන්දා. දේශප්‍රේමය, ජාත්‍යාලය ගැන වැඩියෙන් කතා කරන කාලයක් නිසා!!!! හ්ම්... ඒවයින් කමක් නෑ, මම මේ කියන්න යන්නේ Windows 7 වල වැඩි දෙනෙක් දන්නේ නැති පහසුකමක් ගැනයි. Windows 7 OS එක සිංහලෙන් තිබුණොත් කොහොම හිටීද? එහෙම කිව්වට එහෙමම නෑ හැබැයි...

Microsoft Windows Language Interface Pack (LIP) පැකේජය මඟින් තමයි මේ පහසුකම දෙන්නේ. මේ පැකේජය ඇතුළට Windows බෙහෙවින් ම භාවිතා කරන ප්‍රදේශ වල තියෙන භාෂා ඇතුළත් වෙනවා. ඒ අතරට අපේ සිංහල භාෂාවත් තියෙනවා කියන එක ගැන අහන්නත් සතුටුයි නේද? මෙතනදි වෙලා Windows වල මූලික භාෂාව වෙන ඉංග්‍රීසී එහෙමම තියෙද්දී එයින් 80%ක් විතර සිංහල අතුරු මුහුණතක් ලබා දීලා තියෙනවා. ඒ වගේම මෙහිදී ඉංග්‍රීසි මූලික වුන LIP පැකේජ කිහිපයක් වුනත් පාවිච්චි කරන්න පුළුවන්. ඒ කියන්නේ ඕන නම් තවත් භාෂා කිහිපයක් වුනත් එක මත එක පිහිටුවන්න පුළුවන්. ලෝකය පුරා භාෂා විශාල ප්‍රමාණයකට මේ පහසුකම දීලා තියෙනවනේ. ඒ කොහොම වුනත් බාගත කරන්න තියෙන්නේ 7 MB විතර පොඩි file 1ක්.

බලන්නකෝ පහත screenshots දිහා.





මෙතනින් ගිහින් බාගන්න වගේ ම ස්ථාපනය කරන්න ඕන උපදෙස් එහෙමත් ගන්න පුළුවන්! කැමති අය try කරලා බලන්නකෝ...!

2 දෙනෙකුට හිතුණ දේවල්:

Post a Comment

කමෙන්ටුවකින් දෙන්න පොඩි තල්ලුවක්. පෝස්ටුව ගැන හිතට හිතෙන දැනෙන ඕනෙ ම දෙයක් ලියන්න මෙතැන තමයි තැන ඔන්න.... හිතේ සතුට තමයි වටින්නේ !

හන්තානට පායන සඳේ ඇතුළු කථාව ....


අද නම් තරමක් වෙනස් විදියේ දෙයක් ගැන කතා කරන්නයි මම ලෑස්ති. අපි හැමෝම විනෝදාංශයක් විදියට, එහෙමත් නැත්තම් සමහරු කාලේ ගෙවාගන්න කරන දෙයක් තමයි සින්දු අහන එක. සමහරු කැමති වේග රිද්ම, බයිලා, තවත් සමහරු කැමති ශාස්ත්‍රීය ඒවාට, තවත් සමහරු කැමති හින්දි, ඉංග්‍රීසී සින්දු වලට, සමහරු විරහ ගීත වලට. ඔය කොයි විදියට බැලුවත් අඩු වැඩි වශයෙන් ලොකු පොඩි භේදයක් නැතුව හැමෝම එක එක විදියේ සින්දු අහන්න ආසයිනේ. ගොඩක් දෙනා අහලා ඇති නේද අමරසිරි පීරිස් මහත්මයා ගායනා කරන හන්තානට පායන සඳ සින්දුව. ඒක ගොඩක් දෙනා අතර ජනප්‍රිය සින්දුවක් වගේම අනිත් සින්දු වලට සාපේක්ෂව ටිකක් විතර කෙටි සින්දුවක්. ඒ කොහොම උනත් අද මට හිතුනා මේ සින්දුව ගැන සටහනක් ලියන්න. මේ සින්දුවට පසුබිම් වුන කථාව නම් සමහරු නම් දන්නවත් ඇති. පහලින් තියෙන්නේ ඒ සින්දුවයි පද රචනයයි.

හන්තානට පායන සඳ ලස්සනයිද කියන්න
…මා නොදකින ඒ පුරහඳ ඔබට හැකිය බලන්න//

අඳුරු ලලා වහිනා විට සරසවි බිම තෙමෙන්න//
කුඩේ යටින් ඔබ යනෙනා විට එපා තනිය දැනෙන්න

ලතා මඬුළු අත වනාවි එපා අහක බලන්න//
…මා ගැන මතකය ගුලි කර මහවැලියට දමන්න.

හන්තානට පායන සඳ ලස්සනයිද කියන්න 
මා නොදකින පුරහඳ ඔබට හැකිය බලන්න//
… …
ටිකක් විතර නිදහසේ පදවැල් ටික කියවන්නකෝ, මොනවගේ හැඟීමක් ද එන්නේ කියලා බලන්න. ම්ම්ම්.... විරහව නේද දැනෙන්නේ. ඔයාලා හරි. මේ සින්දුවට පසුබිම් වුන කථාවත් ටිකක් දුක හිතෙන එකක්.

මේක රත්නපුර පැත්තේ වුන සිදුවීමක්. තරුණයෙක් සහ තරුණියක් අතරේ ආදරයක් ඇතිවෙනවා, හැබැයි ඔවුන් දෙදෙනා තවමත් පාසල් යනවා. ඔය විදියට කාලයත් එක්ක ඒ දෙන්නාගේ ආදරය ගලාගෙන යද්දි පාසල් කාලයෙත් අවසානය ටික ටික ළං වෙනවා. ඒ කියන්නේ උසස් පෙළ විභාගය ළං වෙනවා. සාමාන්‍ය විදියට දෙන්න ම විභාගය අවසන් කරලා , ඊට පස්සෙත් බොහොම ආදරණීය විදිය මේ දෙන්නා මාස කිහිපයක් ඉද්දී තමයි විරහව කියන දේ තරුණයා ට දැනෙන සිදුවීම සිද්ධ වෙන්නේ. ඒ කියන්නේ උසස් පෙළ ප්‍රතිඵල ඇවිත් තරුණිය පේරාදෙණිය සරසවියට තේරිලා. ඒ වුනත් තරුණයාට ඒ කියන්නේ පෙම්වතා ට සරසවි පිවිසුම අහිමි වෙලා.

පෙම්වතාට දැනෙනවා ඇයයි ඔහුයි අද ඉඳන් සමාජ ස්ථර දෙකක් කියලා. මේ වෙලාවෙදි තමයි පෙම්වතා ට විරහා වේදනාව දැනෙන්නේ. ඔහුට දැනෙනවා සරසවියට ඈ ගියා ම ඔහුට ඇය ව නැතිවෙයි කියලා. සාමාන්‍යයෙන් ලස්සන තරුණියක් තනියම සරසවියට ගියා ට ඇය එළියට එන්නේ තනියම නෙවෙයි කියලා සමාජයේ තියෙන කතාව පෙම්වතා ට මතක්වෙනවා. ඒ හින්දා ම ඔහු කියනවා "මා නොදකින ඒ පුරහඳ ඔබට හැකිය බලන්න" කියලා. සරසවියක් කියන්නේ එක එක විදියේ අය ගැවසෙන තැනක්. ඒ විශාල පිරිස මැද්දේ ඈ තනිවෙයි කියලා පෙම්වතා ට පුංචි බයකුත් දැනෙනවා. ඇගේ ආරක්ෂාව ගැන ඔහු ගමේ ඉඳන් ලත වෙනවා මේ විදියට "කුඩේ යටින් ඔබ යනෙනා විට එපා තනිය දැනෙන්න". ඒ හින්දා ම පෙම්වතා ටිකක් විතර දරුණු තීරණයක් ගන්නවා. "ලතා මඬුළු අත වනාවි එපා අහක බලන්න". ලතා මඬුළු ළඟ ඉඳන් අත වනන ප්‍රේමවන්තයන්ගෙන් කෙනෙකුට ඈ කැමති නම් ඔහු ඇයගෙන් ඉවත් වෙන්න තීරණය කරනවා මේ විදියට "මා ගැන මතකය ගුලි කර මහවැලියට දමන්න". පේරාදෙණිය සරසවියයි මහවැලි ගඟයි කියන්නේ එකිනෙකට බද්ධ වුන වස්තූන් දෙකක්නේ . ඒ නිසා ම පෙම්වතියට කැමති නම් ඔහු නම් ගැන මතකය, ආදරය හැමදේම මහවැලි ගඟට සදහට ම දාන්න කියලා ඔහු ඇගෙන් ඉල්ලනවා. …

පද රචකයා ගොඩක් අපූරුවට පෙම්වතාගේ විරහව අකුරු වලට ගලපලා තියෙනවා කියලා මට හිතෙනවා. ඒ වගේ ම ඇත්තට ම ඒ දෙන්නා අතරේ නියම ආදරයක් තියෙනවා නම් ඒ දෙන්නට වෙන් වෙන්න වෙන එකකුත් නැති වේවි කියලා මට හිතෙනවා, ඒත් ඔය වගේ අවස්ථා වලදී සම්බන්ධය නොබිඳී තියෙනවා මම දැකලා තියෙන්නේ නම් ගොඩක් අඩුවෙන්. ඒ කියන්නේ කෙල්ල කැම්පස් ඇවිත් කොල්ලා එලියේ ඉන්නවා නම්. ඒත් කොල්ලා කැම්පස් ඇවිත් කෙල්ල එළියේ ඉන්නවා නම් කතන්දරේ ඔයිට වඩා ටිකක් වෙනස්. ඒ කියන්නේ ගොඩාක් වෙලාවට ඒ සම්බන්ධය ස්ථාවරයි. ඒ අතරේ කැම්පස් එකේ ඉද්දි තනියට කියලා තවත් කෙල්ලෙක් එක්ක සෙට් වෙන කොල්ලොත් නැතුවා ම නෙවෙයි. අර මුලින් කිව්ව විදියට වෙන්න හේතුව අනාගතයේ ඒ දෙන්නගේ සමාජ ස්ථර අතර ඇතිවෙයි කියලා හිතන ඝට්ටනය වෙන්නෝන මම හිතන්නේ. එක අතකට දෙන්න ම කතා කරලා යාළුකමත් තියාගෙන ම සුහද ව වෙන්වෙනවා නම් ඒකත් හොඳයි නේද?

ඒ කොහොම වුනත් මොන අවස්ථාවකදි වුනත් කොල්ලෝ මේ තරම් පරිත්‍යාගශීලී විය යුතු ද? මගේ මතය නම් ඔව් කියන එක. තමන්ට වඩා හොඳ කොල්ලෙක්, තමන්ගේ කෙල්ලට ලැබෙන්න යනවා නම් ඒකට තියෙන බාධාව තමන් නම් අනිවාර්යෙන් ම ඇත්තට ම කෙල්ලට ආදරේ කොල්ලෙක් කරන්නෝන කෙල්ල ගෙන් අයින් වෙන එක කියලා මම හිතනවා. කොහොමත් මේ ගැන එක එක්කෙනාගේ එක එක විදියේ අදහස් තියෙන්න පුළුවන්. කොහොම වුනත් යාළුවනේ මේ ගැන සංවාදයට විවෘතයි. ඒ නිසා ඔයාලාගේ අදහසුත් එකතු කරන්නකෝ මේ ගැන. මේ ගීතයේ පද රචකයා සහ තනු නිර්මාපකයා ගැන නම් හොයාගන්න බැරිවුනා. කවුරුහරි දන්න කෙනෙක් ඉන්නවා නම් ඒ ගැනත් සටහනක් තියන්න. මොකද සින්දුවක් කියන්නේ ගායකයා, පද රචකයා සහ තනු නිර්මාපකයා කියන තුන්දෙනාගෙම සාමූහික උත්සහයක ප්‍රතිඵලයක් නිසා...

ප.ලි : Image Processing in C# ගැන කවුරුහරි දන්න කෙනෙක් ඉන්නවද? …

15 දෙනෙකුට හිතුණ දේවල්:

Post a Comment

කමෙන්ටුවකින් දෙන්න පොඩි තල්ලුවක්. පෝස්ටුව ගැන හිතට හිතෙන දැනෙන ඕනෙ ම දෙයක් ලියන්න මෙතැන තමයි තැන ඔන්න.... හිතේ සතුට තමයි වටින්නේ !

Trojan Horse ගේ කතන්දරේ....



ඔන්න හා හා පුරා කියලා දෙවෙනි වතාවට මම කතන්දරයක් කියන්නයි යන්නේ. කතන්දරයක් කිව්වට මේක තාක්ෂණික කතන්දරයක්. සමහර අයට මතක ඇති මගේ පළවෙනි තාක්ෂණික කතන්දරේ දුරකථනය ගැන. ඒකෙයි මේකේ සම්බන්ධයක් නම් නෑ ...සමහර දේවල් තියෙනවා කොයිතරම් ඉගැන්නුවත් වැඩක් නෑ, අපිට උදාහරණ වලින් කිව්වම නම් නියමෙට තේරෙනවනේ, ගොඩාක් හොඳට මතක හිටිනවනේ! මමත් Trojan Horse ගේ ක්‍රියාකාරීත්වය ගැන හරියටම තේරුම් ගත්තේ ඒ විදියට. ඔයාලාට නම් ඒක කොයිතරම් දුරට හරියයි ද දන්නේ නෑ, බලන්නකෝ කතන්දරේ කියවලා ම!


මේ ට්‍රෝජන් අශ්වයාගේ කතාව. ඔන්න එකමත් එක කාලෙක පුරාණ නගරයක් තිබුණා බටහිර ආසියාවේ කෙළවරට වෙන්න, ග්‍රීසිය කිට්ටුව (ග්‍රීසිය මුහුදෙන් එහා පැත්තේ තියෙන්නේ ) ට්‍රෝයි පුරය කියලා. උඩ map එකේ රතු පාට රවුමකින් තියෙන්නේ ට්‍රෝයි පුරය තමයි. ග්‍රීක් වරු කියන්නේ රණකාමි ජාතියක් කියලා ඔයාලා දන්නවා ඇතිනේ, සූර පප්පා එහෙම බැලුව අය!!! ග්‍රීක් වරු කොයිතරම් රණකාමී ජාතියක් වුනත් එයාලට ට්‍රෝයි පුරය නම් ජයගන්න බැරිවුනා. ඒකට හේතුව තමයි ට්‍රෝයි වැසියෝ සතුරු ආක්‍රමණයන්ට එරෙහිව නගරය වටේට ශක්තිමත් ප්‍රාකාරයක් බැඳලා තිබුණා. යුද්ද කාලේ මේ ප්‍රාකාරයේ දොරටු වහලා තිබුණා පිටතින් සතුරන් එන එක වළක්වන්න. ඒ වගේම දුනුවායෝ ඒක උඩ ඉඳන් සතුරු හමුදා වලට විදලා පලවා හරිනවා නගරයට ඇතුළු වෙන්න කලින්. ග්‍රීක්වරු කොයිතරම් නගරය යටත් කරගන්න මහන්සි වුනාද කිව්වොත් අවුරුදු දහයක් පුරා ඔවුන් යුද්ධ කලා. ඒකට හේතුව තමයි එයාලගේ නම්බුව වෙනුවෙන් පරාජය පිළිගන්න අකමැති වුන එක. ඒ කොහොම උනත් දෙපැත්තෙම අය හෙම්බත් වෙලා හිටියේ අවුරුදු දහයක් යුද්දෙන්.


එක දවසක් ග්‍රීක ජෙනරාල්වරයා වුන ඔඩිසිස් ට නියම අදහසක් පහළ වුනා යුද්දේ දිනන්න පුලුවන් විදියේ. ඔහු තීරණය කලා ට්‍රෝයි නගරය අතහැරලා යන්න, ඒ වගේම ට්‍රෝයි නගර වැසියන් ට සාමයේ ත්‍යාගයක් යවන්නත්. ඒ තමයි දැවයෙන් කල විශාල ප්‍රමාණයේ ලස්සන අශ්වයෙක්. කොහොමත් ග්‍රීක්වරු රණකාමි වගේ ම ගොඩාක් කලාකාමී ජාතියක් නිසා ම සිත් ඇදගන්නා සුළු විදියට දැව අශ්වයා හදන්න ඔවුනට පුළුවන් වුනා. ඒ අශ්වයා ව එක් පුද්ගලයෙක් මඟින් ට්‍රෝයි පුරයට යවන ගමන් ම ග්‍රීක් වරු ට්‍රෝයි පුරයෙන් ඈතට යන්න ගියා. ට්‍රෝයි වැසියෝ, ග්‍රීක් වරු යනවා දැකලා ඉතා ම සතුටට පත් වුනා වගේ ම ආඩම්බරයට පත් වුනා ඔවුන් යුද්දේ දිනුවා කියලා. ඒ නිසා ම අර තෑග්ග සතුටින් පිළිගත්තා. "හරි ම අපූරු අශ්වයෙක්, අපේ ජයග්‍රහණයේ සැමරුම තමයි මේ" කියලා උදම් අනලා ප්‍රීති උත්සව පවත්වන්න පටන් ගත්තා.

දැන් තමයි නියම වැඩේ වුනේ. ප්‍රීති වෙමින් හිටිය ට්‍රෝයි වැසියෝ රාත්‍රිය බොහොම සතුටින් නිදාගත්තා. ඔවුන් නින්දට යනකල් ඉඳලා අර ලී අශ්වයා ඇතුලේ හංගලා හිටිය ග්‍රීක් සෙබළු එලියට ඇවිත් නගර ප්‍රාකාරය උඩට නැඟලා නගරයේ දොරටු විවෘත කලා ග්‍රීක් හමුදාවට. ග්‍රීක් හමුදාවත් යනවා වගේ පෙන්නුවත් ටිකක් දුරට ගිහින් ආයෙත් ඇවිත්. ඉතින් හිතාගන්න පුලුවන් නේ ට්‍රෝයි පුරයේ අවසානය ගැන. ඔන්න ඔහොම තමයි ග්‍රීක් වරු ට්‍රෝයි පුරය ජයග්‍රහණය කරලා තමන්ගේ කීර්ති නාමය ආරක්ෂා කරගත්තේ. "Beware of Greeks bearing gifts!" කියන අපූරු කියමන හැදුනෙත් ඔය විදියට තමයි.

ඔය තමයි Trojan Horse ගේ කතාව. ඒ වුනත් අපි Trojan Horse ව දන්නේ ප්‍රසිද්ධ malicious program එකක් විදියට නේ. මේ විදියට තමයි කතා දෙක සම්බන්ධ වෙන්නේ. Trojan Horse වයිරස් වගේ ස්වයං පුනරාවර්තනය වෙන්නෙ නම් නෑ. ඒත් ඊට වඩා විනාශකාරී විදියට අපේ පරිගණකය ඇතුලේ ක්‍රියාත්මක වෙනවා. මොනයම් විදියකින් හරි Trojan Horse වැඩසටහනක් පරිගණකයේ ස්ථාපනය වුනා කියලා හිතන්නකෝ, වෙනත් තැනක ඉන්න hacker කෙනෙකුට ඒ වැඩසටහන යොදාගෙන අපේ information access කරන්න පුළුවන්. ඒ වගේම විවිධ ආකාරයේ හානි කරන්න පුළුවන් පරිගණකයේ දත්ත වලට. මේ තමයි Trojan Horse ට කරන්න පුළුවන් දේවල්.

1. අපේ පරිගණකය botnet එකක සාමාජිකයෙක් කරන එක.
2. දත්ත සොරකම් කිරීම.
3. Third-party malwares install කිරීම.
4. Files Downloading or uploading.
5. Data Modification.
6. Crashing the computer.
7. Keystroke logging

Trojan Horse ගෙන් බේරෙන්න කරන්න පුළුවන් හොඳම දේ තමයි අපි අන්තර්ජාලයෙන් මෘදුකාංග බාගත කිරීමේ දී පිළිගත් අඩවි වලින් විතරක් ගන්න එක. ඒ වගේ ම ස්ථාපනය කිරීමේදිත් සැලකිලිමත් වෙන්නෝන. මෘදුකාංග බාගත කරන්න කලින් ඒ ගැන තියෙන Comments එහෙමත් බලන්න. කතන්දරේ කොහොමද කියලා ප්‍රතිචාරයක් දාලා ම යන්න අමතක කරන්න එපා.

4 දෙනෙකුට හිතුණ දේවල්:

Post a Comment

කමෙන්ටුවකින් දෙන්න පොඩි තල්ලුවක්. පෝස්ටුව ගැන හිතට හිතෙන දැනෙන ඕනෙ ම දෙයක් ලියන්න මෙතැන තමයි තැන ඔන්න.... හිතේ සතුට තමයි වටින්නේ !